دەپۋتات امانجول ءالتاي ءمان-ماعىناسى جوق وردەن-مەدالدارى، جالعان اتاقتار قاپتاپ كەتكەنىن ايتتى،- دەپ حابارلايدى Dalanews.kz.
ءماجىلىس دەپۋتاتى مۇنداي ءۇردىس ەشكىمگە دە ابىروي اپەرمەيدى، كەرىسىنشە ادامدى داڭعويلىققا، جەڭىل اتاققۇمارلىققا يتەرمەلەيتىنىن ايتادى.
"مىسالى، ءسىز 50 مىڭ تەڭگەگە پىسىقاي ۇيىمنىڭ اتىنان "قازاقستاننىڭ ەڭبەك سىڭىرگەن قىزمەتكەرى" مەدالىنە، ال 100 مىڭ تەڭگەگە "قازاقستاننىڭ قۇرمەتتى ازاماتى" اتاعىنا يە بولاسىز.
سان عاسىرلىق ەلدىك تاريحىمىزدا "ۇلت ۇستازى" دەپ حالىق ۇسىنعان ساۋلەلى ءسوزدى قاستەرلەپ احمەت بايتۇرسىنۇلىنا عانا قولداناتىن ەدىك، ءقازىر "ۇلت ۇستازى" دەگەن اتاقتى بار بولعانى 10 مىڭ تەڭگەگە ساتىپ الا سالاسىز. اكادەميك دەگەندە كوز الدىمىزعا قانىش ساتبايەۆ سەكىلدى عۇلاما عالىمدار ەلەستەۋشى ەدى، ءقازىر 200 مىڭ تەگە بەرىپ قاپتاعان تۇسىنىكسىز اكادەميالاردىڭ جالعان اكادەميكگى بولا سالاسىز"، - دەيدى دەپۋتات.
امانجول ءالتاي بۇل قۇرمەتتەۋ ەمەس قورلاۋ، جۇرتتى الاوكپە قىلاتىن،وتە ءقاۋىپتى ءارى قوعامدى بۇلدىرەتىن ءۇردىس ەكەنىن اتاپ ءوتتى.
"وسى رەتتە، ادىلەتتى كەلەشەككە قادام باسقىمىز كەلسە، ساتىلاتىن ءمانسىز ماراپاتتاردان قوعامدى ساقتاندىرۋ ماڭىزدى. مەملەكەتتىك رامىزدەرىمىزدى رەتسىز قولدانىپ، جالعان اتاقتار مەن قۇنسىز سولكەبايلاردى ساتىپ پايدا تاپقىش پىسىقايلاردىڭ ارەكەتتەرىنە قۇقىقتىق نەگىزدە تىيىم سالۋ كەرەك"، - دەيدى امانجول ءالتاي.
