سوڭعى جىلدارى قازاقستاندا بالالاردىڭ ءبىلىم الۋىنا زاماناۋي جاعداي جاساۋ باعىتىندا ەلەۋلى ىلگەرىلەۋ بايقالدى. مەملەكەت باسشىسىنىڭ تاپسىرماسىنا سايكەس، 2019 جىلدان بەرى 1 ميلليوننان استام وقۋشىعا ارنالعان 1200 مەكتەپ سالىندى،- دەپ حابارلايدى Dalanews.kz وقۋ-اعارتۋ مينيسترلىگىنە سىلتەمە جاساپ.
تەك 2023-2024 جىلدارى 510 مىڭ ورىنعا ارنالعان 422 جاڭا مەكتەپ اشىلدى.
وسى شارالاردىڭ ناتيجەسىندە ەلىمىزدەگى ءۇش اۋىسىمدى مەكتەپتەردىڭ سانى 4 ەسە، اپاتتى مەكتەپتەردىڭ سانى 2 ەسە ازايدى، ال وقۋشى ورىندارىنىڭ تاپشىلىعى 4 ەسە قىسقاردى.
- مەملەكەت زاماناۋي جانە قولايلى ءبىلىم بەرۋ ورتاسىن قۇرۋ بويىنشا جۇيەلى جۇمىستى جالعاستىرۋدا. جاڭا وقۋ جىلىنىڭ قارساڭىندا وڭىرلەردە 115 مىڭ وقۋشىعا ارنالعان تاعى 83 جاڭا مەكتەپ اشىلدى، ونىڭ 57ء-سى «كەلەشەك مەكتەپتەرى» ۇلتتىق جوباسى اياسىندا سالىنعان. جاڭا مەكتەپتەردىڭ پايدالانۋعا بەرىلۋى شىمكەنت، الماتى قالالارىندا، اقمولا، قاراعاندى جانە قىزىلوردا وبلىستارىندا ءۇش اۋىسىمدى وقىتۋ ماسەلەسىن تولىعىمەن جويۋعا مۇمكىندىك بەردى، - دەلىنگەن ۆەدومستۆو حابارلاماسىندا.
قازىرگى ۋاقىتتا ەلىمىزدە 3000 مەكتەپ ءبىر اۋىسىمدا، 5000-نان استام مەكتەپ ەكى اۋىسىمدا جۇمىس ىستەيدى. جىل سوڭىنا دەيىن 140 مىڭ ورىنعا ارنالعان تاعى 111 مەكتەپتىڭ قۇرىلىسى اياقتالادى.
جوعارىدا اتالعان جوبالاردىڭ جۇزەگە اسىرىلۋى ەلىمىزدىڭ كوپتەگەن وڭىرلەرىندە ءۇش اۋىسىمدى وقىتۋدى جويۋعا جانە قوسىمشا 150 مىڭ ورىن تاپشىلىعىن قىسقارتۋعا مۇمكىندىك بەرەدى.
2025–2026 وقۋ جىلىندا ەلىمىزدە جالپى سىيىمدىلىعى 267 مىڭ وقۋشىعا ارنالعان 232 جاڭا مەكتەپ سالىنادى. سونىمەن قاتار 245 مەكتەپ جاڭعىرتۋدان وتەدى، تاعى 1000 اۋىل مەكتەبى مودەرنيزاسيالانادى، ال 680 مەكتەپكە 1100 زاماناۋي پاندىك كابينەت ورناتىلادى.
رەسپۋبليكالىق ءبىلىم بەرۋ ۇيىمدارىنىڭ ينفراقۇرىلىمى دا جاڭارتىلۋدا. تۇركىستانداعى «ءبىلىم-يننوۆاسيا» ليسەيىندە جانە الماتىداعى رەسپۋبليكالىق فيزيكا-ماتەماتيكا مەكتەبىندە جوندەۋ جۇمىستارى اياقتالدى، الماتىدا «اباي ۇلتتىق مەكتەبى» جاڭا عيماراتى قۇرىلىسىنىڭ اياقتالۋى جوسپارلانۋدا.
