ۇكىمەتتىڭ كەڭەيتىلگەن وتىرىسىندا پرەمەر-مينيستر ولجاس بەكتەنوۆ بيىل قازاقستاندا ءۇش اەس سالىنۋى مۇمكىن ەكەنىن مالىمدەدى، دەپ حابارلايدى Dalanews.kz.
"الماتى وبلىسىندا العاشقى اەس سالۋ بويىنشا قاجەتتى كەلىسىمدەر جاقىن ارادا جاسالادى. سونداي-اق ەكىنشى جانە ءۇشىنشى اتوم ەلەكتر ستانسيالارىن سالۋعا بولاتىن ايماقتاردى انىقتاۋ بويىنشا تالداۋ جۇمىستارى اياقتالۋعا جاقىن"، – دەدى بەكتەنوۆ.
ەسكە سالايىق، الماتى وبلىسى جامبىل اۋدانى ۇلكەن اۋىلى ماڭىندا قۋاتتىلىعى 2–2،8 گۆت بولاتىن اتوم ەلەكتر ستانسياسىن سالۋ ماسەلەسى تالقىلانىپ جاتىر.
مينيسترلىك وكىلدەرىنىڭ مالىمەتىنشە، يادرولىق تەحنولوگيا جەتكىزۋشى الەۋەتتى كومپانيالارمەن كەلىسسوزدەر جۇرگىزىلىپ جاتىر. سونىمەن قاتار ۇسىنىستاردى باسەكەلەستىك نەگىزدە قاراستىراتىن ۇكىمەتارالىق كوميسسيا قۇرىلعان.
“بالامالى جانە جاڭارتىلاتىن ەنەرگيا كوزدەرىن، سونداي-اق گاز گەنەراسياسىن ەنگىزۋ ەلەكتر ەنەرگياسىن تۇتىنۋداعى كومىر گەنەراسياسىنىڭ ۇلەسىن ايتارلىقتاي ازايتۋعا مۇمكىندىك بەرەدى”، – دەلىنگەن ق ر ەنەرگەتيكا مينيسترلىگى تاراتقان حابارلامادا.
جوسپار بويىنشا، 2035 جىلعا قاراي كومىرقىشقىل گازى قالدىقتارىن جىلىنا 44 ملن تونناعا ازايتۋ كوزدەلگەن.
“قازىرگى تاڭدا ەنەرگيا كوزدەرى شتاتتىق رەجيمدە جۇمىس ىستەپ تۇر، ال جىلىتۋ ماۋسىمى تۇراقتى تۇردە ءوتىپ جاتىر. جۇزەگە اسىرىلىپ جاتقان بارلىق جوبا العاشقى رەسۋرستارمەن جەتكىلىكتى دەڭگەيدە قامتاماسىز ەتىلگەن”، – دەپ تولىقتىردى ۆەدومستۆو.
ايتا كەتەيىك، 2 قىركۇيەكتە قاسىم-جومارت توقايەۆ قازاقستاندا اتوم ەلەكتر ستانسياسىن سالۋ بويىنشا رەفەرەندۋم وتكىزۋ تۋرالى جارلىققا قول قويدى.
ال رەفەرەندۋم بويىنشا داۋىس بەرۋ 6 قازاندا ءوتتى. بۇل رەتتە اەس سالۋدى داۋىس بەرگەندەردىڭ 71،12 پايىزى قولدادى. رەفەرەندۋمعا داۋىس بەرۋ تىزىمىنە 12،3 ميلليونعا جۋىق قازاقستاندىق ەنگىزىلگەن.
بۇعان دەيىن توقايەۆ شەتەلدىك ينۆەستورلار كەڭەسىنىڭ 36-شى پلەنارلىق وتىرىسىندا قازاقستان اەس قۇرىلىسى ءۇشىن حالىقارالىق كونسورسيۋم قۇرۋ ماسەلەسىن پىسىقتاپ جاتقانىن مالىمدەگەن ەدى.
“ءبىزدىڭ ەلىمىز يادرولىق وتىن سيكلى اياقتالعان دەرلىك الەمدەگى ەڭ ءىرى ۋران ءوندىرۋشى سانالادى. وزدەرىڭىز دە بىلەتىندەي، جاقىندا وتكەن جالپىۇلتتىق رەفەرەندۋمدا قازاقستاندا العاشقى اتوم ەلەكتر ستانسياسىنىڭ قۇرىلىسى ماقۇلداندى. بۇل ءبىزدىڭ ەنەرگەتيكالىق قاۋىپسىزدىگىمىزگە ۇزاق مەرزىمدى ينۆەستيسيا سانالادى. قازىرگى ۋاقىتتا ءبىز وسى جوبا ءۇشىن حالىقارالىق كونسورسيۋم قۇرۋ ماسەلەسىن پىسىقتاپ جاتىرمىز”، — دەدى قاسىم-جومارت توقايەۆ.
قازاقستان ىقتيمال تەحنولوگيا جەتكىزۋشىسى رەتىندە ءتورت كومپانيانى قاراستىرىپ جاتىر. ولار، رەسەيلىك "روساتوم"، قىتايدىڭ CNNC، كورەيانىڭ KHNP جانە فرانسيانىڭ EDF كومپانيالارى.
