بۇل تۋرالى Informburo.kz-كە سىلتەمە جاساعان sn.kz حابارلايدى. ق ر ءدىن ىستەرى جونىندەگى كوميتەت بۇگىندە سالافيزم اعىمىنىڭ بولاشاعىن تالقىلاپ جاتقان كورىنەدى. ءدىني اعىمدارعا تىيىم سالۋ تۋرالى ۇسىنىستى جاسايتىن دا وسى ۆەدومستۆو.
"ساراپشىلار اراسىندا قازاقستاندا سالافيزمگە تىيىم سالۋ ماسەلەسى ءبىرىنشى جىل تالقىلانىپ جاتقان جوق. بيىل سالافيزمگە قارسى تاراپتىڭ ارگۋمەنتتەرى كوپ. اقتوبە مەن الماتىداعى لاڭكەستىك وقيعالاردىڭ ارتىندا وسى سالافيزم باعىتىن ۇستانۋشىلاردىڭ تۇرعانى بەلگىلى بولىپ وتىر. قازىرگى تاڭدا قۇزىرلى مەملەكەتتىك ورگاندارمەن بىرىگىپ، ورىن العان جايتتاردىڭ دەرەكتەرىن زەرتتەپ جاتىرمىز. جان-جاقتى زەرتتەۋلەر جۇرگىزىپ بولعان سوڭ ءتيىستى شەشىم دە قابىلدايتىن بولامىز"، - دەلىنگەن كوميتەت وكىلدەرىنىڭ جاۋابىندا.
ولاردىڭ ايتۋىنشا، مەملەكەت سالافيلەردىڭ ارەكەتىنە بارىنشا قاتاڭ شارالار قولداناتىن بولادى.
"بۇگىندە قازاقستاندا تىيىم سالىنعان اعىمداردىڭ قاتارىندا "حيزب-ۋت تاحرير"، "تابليعي-جاماعات"، "ات-تاكفير ءۋال-حيدجرا" سىندى ءدىني ۇيىمدار بار. بۇلاردىڭ سوڭعىسى سالافيزم يدەولوگياسى نەگىزىندە قۇرىلعان. سوت شەشىمىمەن ەندى بۇل ءتىزىم تاعى تولىعۋى مۇمكىن. تىيىم سالۋ وڭاي شارۋا ەمەس، اسىرەسە، ۇلكەن ءبىر ءدىني اعىم تۋرالى ءسوز بولىپ وتىرعان ساتتە. ول ءۇشىن ناقتى دالەلدەر كەرەك. ءقازىر بۇل ماسەلەمەن ءتيىستى ورگاندار اينالىسىپ جاتىر"، - دەيدى ءدىن ىستەرى كوميتەتىندەگىلەر.
ايتا كەتەيىك، قازاقستاندا سالافيزم اعىمىنا تىيىم سالۋ ماسەلەسى اقتوبەدەگى لاڭكەستىك وقيعادان كەيىن قىزۋ تالقىلانىپ جاتىر. 7 ادامنىڭ ءومىرىن جۇتقان تەراكتىنىڭ ارتىندا سالافيلەردىڭ تۇرعانىن مەملەكەت باسشىسى ن.نازاربايەۆتىڭ ءوزى دە ايتتى.
الايدا، ەلباسىنىڭ بۇل سوزىمەن كەلىسپەگەن ءماجىلىس دەپۋتاتى ومارحان وكسىكبايەۆ سالافيلەردەن كەلەتىن ءقاۋىپتىڭ جوق ەكەنىن ايتىپ سۇحبات بەردى. ءتىپتى، ق ر سىرتقى ىستەر ءمينيسترى ەرلان ىدىرىسوۆ تا ساۋديالىق ارىپتەستەرىمىزدى رەنجىتىپ الماۋ ءۇشىن سالافيزمگە تىيىم سالۋعا بولمايتىنىن مەڭزەگەن.
