ىشكى ىستەر مينيسترلىگى ۇيىمداسقان قىلمىستىق توپتاردىڭ قىزمەتىن اشكەرەلەۋ جانە توقتاتۋ جۇمىستارىن جۇيەلى تۇردە جۇرگىزۋدە. جىل باسىنان بەرى قىلمىستىق قۇرىلىمداردىڭ باسشىلارى مەن قاتىسۋشىلارىنا قاتىستى 51 قىلمىستىق ءىس قوزعالدى، دەپ حابارلايدى Dalanews.kz.

"الماتى قالاسىنىڭ پوليسيا دەپارتامەنتى كۇزەت قىزمەتى تۇرىندە ارەكەت ەتىپ، ءىس جۇزىندە بۇزاقىلىق، بوپسالاۋ جانە قارۋ ساقتاۋ سياقتى زاڭسىز ارەكەتتەرمەن اينالىسقان قىلمىستىق توپ مۇشەلەرىنە قاتىستى ۇيىمداسقان قىلمىستىق توپ قۇرۋ جانە وعان قاتىسۋ فاكتىلەرى بويىنشا قىلمىستىق ىستەردى تەرگەپ جاتىر. ولاردىڭ زاڭعا قايشى ارەكەتتەرى اعىمداعى جىلدىڭ قاڭتار ايىندا ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى تاراپىنان توقتاتىلدى. سونىمەن قاتار ترانسۇلتتىق سيپاتتاعى جەتى ۇيىمداسقان قىلمىستىق توپ بويىنشا جانە ءبىر قىلمىستىق قاۋىمداستىق قۇرۋ فاكتىسى بويىنشا ىستەر تەرگەلۋدە"، - دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.

قازاقستان كريميناليتەتىنىڭ وكىلدەرىنە قاتىستى ترانسۇلتتىق قىلمىستىق قاۋىمداستىق قۇرۋ جانە وعان باسشىلىق ەتۋ فاكتىسى بويىنشا العاش رەت سوتقا دەيىنگى تەرگەۋ باستالدى. اتالعان ىستەر بويىنشا قىلمىستىق قۋدالاۋ اياسىندا تەك ەل ىشىندە عانا ەمەس، شەتەلدە دە اۋىر جانە اسا اۋىر قىلمىستار جاساعان ادامدار بار. ۇلتتىق قاۋىپسىزدىك كوميتەتى، مەملەكەتتىك كۇزەت قىزمەتى جانە باس پروكۋراتۋرامەن بىرلەسىپ، دالەلدەمەلەر جيناۋ بويىنشا كەشەندى ءىس-شارالار جۇرگىزىلىپ جاتىر. جالپى 150-دەن استام ادام جاۋاپكەرشىلىككە تارتىلۋدا.

"سوڭعى ەكى جىل ىشىندە ۇيىمداسقان قىلمىستىق توپتاردى قۇرۋ، باسقارۋ جانە ولارعا قاتىسۋ فاكتىلەرى بويىنشا قوزعالعان 90-نان استام قىلمىستىق ءىس اياقتالىپ، سوتقا جىبەرىلدى. 13 ۇيىمداسقان قىلمىستىق توپ بويىنشا سوت شەشىمدەرى شىعارىلدى. اتالعان ىستەر بويىنشا 130-دان استام ادام 20 جىلعا دەيىن باس بوستاندىعىنان ايىرۋ جازاسىنا كەسىلدى.

مىسالى، "Qarmet" اق نىساندارىنان ۇرلىق جاساۋعا قاتىسى بار ۇيىمداسقان قىلمىستىق توپقا قاتىستى كوپ ەپيزودتى قىلمىستىق ءىس بويىنشا 24 ادام ءارتۇرلى مەرزىمگە سوتتالدى، ونىڭ ىشىندە توپ باسشىسى 12 جىلعا باس بوستاندىعىنان ايىرىلدى"، - دەدى قۋاندىق الپىس.