قازاقستاندا 2019 جىلدىڭ سوڭىندا ورىن العان Bek Air اۋە اپاتىنا قاتىستى تەرگەۋ قايتا جۇرگىزىلەدى. بۇل تۋرالى كولىك ءمينيسترى نۇرلان ساۋرانبايەۆ مالىمدەدى، دەپ حابارلايدى Dalanews.kz.
ءمينيستردىڭ ايتۋىنشا، اتالعان ۇشاق اپاتىنا قاتىستى تەرگەۋ جۇمىستارى قايتا جاندانباق.
"وكىنىشكە قاراي، اۆياسيادا مۇنداي وقيعالار ءجيى بولىپ تۇرادى جانە تۇپكىلىكتى شەشىمگە كەلۋ وتە قيىنعا سوعادى. اۆياسيالىق اپاتتار، وكىنىشكە قاراي، ۇزاق ۋاقىت قارالادى. ءقازىر بارلىق قۇجاتتار دايىندالىپ جاتىر"، – دەدى ساۋرانبايەۆ.
ەسكە سالا كەتەيىك، بۇعان دەيىن، 2024 جىلدىڭ جەلتوقسانىندا ەكس-مينيستر مارات قارابايەۆ تا بۇل ءىس بويىنشا تەرگەۋ قايتا باستالۋى مۇمكىن ەكەنىن ايتقان ەدى.
Bek Air اۋە اپاتى 2019 جىلعى 27 جەلتوقساندا بولعان. الماتىدان نۇر-سۇلتانعا (قازىرگى استانا) باعىت العان ۇشاق اۋەگە كوتەرىلگەننەن كەيىن بىردەن بيىكتىگىن جوعالتىپ، اۋەجاي ماڭىنداعى قورشاۋدى بۇزىپ ءوتىپ، ەكى قاباتتى كوتتەدجگە سوعىلعان. ۇشاقتا 93 جولاۋشى مەن 5 ەكيپاج مۇشەسى بولعان. اپات سالدارىنان 12 ادام قازا تاپقان.
