بۇل تۋرالى sputniknews.kz حابارلادى.
حالىقارالىق وليمپيادا كوميتەتى قازاقستان رەسپۋبليكاسىنىڭ ۇلتتىق وليمپيادا كوميتەتىنە 2008 جانە 2012 جىلدارى وتكەن ويىنداردا دوپينگ قولداندى دەگەن ەكى جۇلدەگەردى مەدالدارىنان ايىرۋ تۋرالى ەسكەرتۋ قاعازىن جىبەردى، دەپ حابارلادى كوميتەتتىڭ باسپا ءسوز قىزمەتى. حالىقارالىق وليمپيادا كوميتەتىنىڭ ءتارتىپ جونىندەگى كوميسسياسىنىڭ شەشىمىنە ساي، “ا” جانە “ۆ” سىنامالارىنىڭ قوسىمشا زەرتتەۋ ناتيجەسىنە بايلانىستى، 2008 جىلى بەيجىڭدە وتكەن وليمپيادا ويىندارىندا 63 كەلى سالماقتا قازاقستان نامىسىن قورعاعان اۋىر اتلەت يرينا نەكراسوۆانىڭ كۇمىس جۇلدەسى، 75 كەلى سالماقتا قولا جۇلدە العان تاعى ءبىر اۋىر اتلەتىمىز — ماريا گرابوۆەسكايانىڭ قولا جۇلدەسى جانە گرەك-ريم كۇرەسى بويىنشا اسەت مامبەتوۆتىڭ قولا جۇلدەسى جويىلىپ، مەدالدارى كەرى قايتارىلاتىن بولدى.
2012 جىلعى لوندون وليمپياداسىندا جەتىنشى ورىن العان اۋىر اتلەت الماس وتەشوۆتىڭ ورنىن جوققا شىعاردى. سونىمەن قاتار، بەيجىڭ جانە لوندون وليمپياداسىنداعى سپورتشىلاردىڭ قان زەرتتەۋىندەگى سوڭعى ناتيجەلەرگە سۇيەنگەن، حوك 2008 جىلعى بەيجىڭ وليمپياداسىندا ونەر كورسەتكەن ۆلاديمير سەدوۆتىڭ — ءتورتىنشى ورنىن، اۋىر اتلەت مايا مانەزانىڭ ورىندارىن جوققا شىعاردى.
