قازاقستان رەسەيمەن دوس ەلدەر رەيتينگىندە ءتۇسىپ كەتكەن. بۇل تۋرالى رەسەيشىل مەديادا ايتىلدى، - دەپ حابارلايدى Dalanews.kz. 

«دوستىق ۇعىمى، زەرتتەۋ اۆتورلارىنىڭ پىكىرىنشە، ءوزارا سىيلاستىققا، ورتاق مۇددەلەر مەن تاتۋ كورشىلىككە نەگىزدەلگەن ەلدەردىڭ قارىم-قاتىناسىن بولجايدى»، - دەلىنگەن جازبادا.

تەلەگرام-ارنا مالىمەتىنشە، بۇگىندە رەسەي فەدەراسياسىمەن جاقىن دوس ەلدەر قاتارىندا وڭتۇستىك وسەتيا، بەلارۋس پەن ابحازيا بار. بۇل ەلدەر ۇلتتىق كوممۋنيكاسيالاردى دامىتۋ عىلىمي-زەرتتەۋ ينستيتۋتىنىڭ رەيتينگىسىنە سايكەس كوشباسشىلار ۇشتىگىنە كىرگەن.

ودان كەيىنگى ورىندارعا – قىرعىزستان، وزبەكستان جانە ازەربايجان جايعاسقان. ال قازاقستان سەگىزىنشى ورىندا. ءتىزىم سوڭىندا – تۇرىكمەنستان مەن ارمەنيا.

«جاقىندا ءبىزدىڭ ەلىمىزدە جيىلەپ كەتكەن رەسەيگە قارسى شابۋىلدار، ەلدى مەكەندەردىڭ اتاۋىن وزگەرتۋ، ورىس تىلىندەگى تەلەحابارلاردىڭ ازايۋى-وسىنىڭ ءبارى وسىنداي قايعىلى سالدارعا اكەلەدى. رەسەي سياقتى قۋاتتى كورشىمەن بىرگە ءومىر سۇرگەن دۇرىس»، - دەلىنگەن جازبادا.

ايتا كەتەيىك، رەسەيلىك بەلگىلى تەلەجۋرناليست تينا كاندەلاكي قازاقستاندا ورىس ءتىلىنىڭ اياسى تارالىپ جاتقانىن ايتىپ، دابىل قاققان ەدى. ونىڭ بۇل مالىمدەمەسى قىزۋ تالقىعا ءتۇستى. 

كولىك مينيسترلىگى كەيبىر تەمىرجول بەكەتتەرىن (كوسشوكۋدى - قوسشوقىعا، ساي-ۋتەستى - سايوتەسكە؛ وزەندى - جاڭاوزەنگە، ۋرالدى - ورالعا) قايتا اتاۋ تۋرالى ۇكىمەت قاۋلىسىنىڭ جوباسىن جاريالاعان بولاتىن.تينا كاندەلاكي Telegram-داعى جەكە پاراقشاسىندا قازاقستان وسىلايشا ورىس ءتىلىن مەملەكەتتىك دەڭگەيدە ىعىستىرىپ جاتىر دەپ پىكىر جازدى.

كەيىننەن ءسىم رەسەيلىك جۋرناليست تينا كاندەلاكي قازاقستانعا كىرمەيتىنىن ايتتى. ارتىنشا تينا كاندەلاكيدىڭ قازاقستانداعى بيزنەسى توقتاپ قالدى.