قازاقستان بايقوڭىر كەشەنىندەگى «گاگارين بەسەدكاسى» جانە وزگە دە ءبىرقاتار نىساندى ءوز مەنشىگىنە قايتارۋدى جوسپارلاپ وتىر. بۇل تۋرالى پرەمەر-مينيستر ولجاس بەكتەنوۆ مالىمدەدى، دەپ حابارلايدى Dalanews.kz.
پرەمەر-مينيستردىڭ ايتۋىنشا، «بايقوڭىر» كەشەنىنىڭ تۋريستىك الەۋەتىنە ەرەكشە نازار اۋدارىلۋدا. ءتۋريزمدى دامىتۋ ماقساتىندا «Kazakh Tourism» اق كەشەن اۋماعىنداعى ءتۋريزمدى دامىتۋ تۇجىرىمداماسىن ازىرلەپ جاتىر.
2024 جىلعى قاراشادا ۇلتتىق ناقىشتا بەزەندىرىلگەن كيىز ءۇي ورناتىلىپ، QAZQOSMOS باقىلاۋ بەكەتى سالىنعان. ول «سويۋز» زىمىراندارىن ۇشىرۋدى تاماشالاۋعا ارنالعان.
سونىمەن قاتار، قازاقستاندىق تاراپقا قايتارۋ جانە تۋريستىك تارتىمدى نىسانداردى جالعا بەرۋ بويىنشا جۇمىستار جۇرگىزىلۋدە. اتاپ ايتقاندا:
«نولدىك كۆارتال»
«گاگارين بەسەدكاسى» (10-الاڭ)
«كوتتەدجدەر» ءقوناقۇيى (2ج-الاڭ)
مونتاجدىق-زارياد كەشەنى (112ا-الاڭ)
ديناميكالىق سىناق ستەندى (112د-الاڭ)
«گاگارين ستارتى» نىسانىن جالعا بەرۋ جۇمىستارى وسى جىلدىڭ ءبىرىنشى جارتىجىلدىعىنىڭ سوڭىنا دەيىن اياقتالادى»، – دەدى بەكتەنوۆ ءماجىلىس دەپۋتاتتارىنىڭ ساۋالىنا جاۋاپ بەرە وتىرىپ.
بەكتەنوۆتىڭ ايتۋىنشا، «ينفراكوس» رمك قازاقستاندىق جانە رەسەيلىك تۋروپەراتورلارمەن قىزمەت كورسەتۋ شارتتارى تۋرالى كەلىسىمدەر جاساعان. سونىمەن قاتار، GEORARK ARAL قوعامدىق قورىمەن مەموراندۋمعا، ال «Kazakh Tourism» اق جانە «BSL consulting» جشس-مەن ءۇشجاقتى ىنتىماقتاستىق تۋرالى كەلىسىمگە قول قويىلعان.
«بايتەرەك» بىرلەسكەن كاسىپورنى دا كەشەننىڭ نەگىزگى نىساندارىن قامتيتىن ەكسكۋرسيالىق باعدارلامالاردى بەكىتتى.
2018 جىلى «بايتەرەك» عارىش-زىمىران كەشەنىن قۇرۋ جوباسىن ىسكە اسىرۋ ءۇشىن «زەنيت-م» زىمىران كەشەنىنىڭ نىساندارى رەسەي فەدەراسياسىنىڭ جالداۋىنان شىعارىلىپ، قازاقستاننىڭ قاراماعىنا قايتارىلعان.
سودان بەرى بۇل كەشەننىڭ جۇمىسقا قابىلەتتىلىگىن ساقتاۋ جانە ماقساتىنا ساي قولدانۋعا دايىندىعىن قامتاماسىز ەتۋ ءۇشىن 010-بيۋدجەتتىك باعدارلاما – «عارىش ينفراقۇرىلىمىن ساقتاۋ جانە پايدالانۋدى كەڭەيتۋ» اياسىندا قارجىلاندىرىلىپ كەلەدى.
2025 جىلى «زەنيت-م» كەشەنىنىڭ جەرۇستى عارىش ينفراقۇرىلىمىن كۇتىپ-ۇستاۋ جانە پايدالانۋ ءۇشىن 937،6 ملن تەڭگە بولىنگەن. سونىمەن قاتار، 155 ينجەنەردى جالداۋ ءۇشىن 590 ملن تەڭگە قوسىمشا قارجىلاندىرۋ رەسپۋبليكالىق بيۋدجەتتى ناقتىلاۋ اياسىندا قاراستىرىلادى.
بۇگىندە ۋاكىلەتتى ورگاندار بايقوڭىر كەشەنىندەگى 69 اۆتوكولىك قۇرالىن جالداۋدان شىعارۋ ماسەلەسىن قاراپ جاتىر. اتالعان كولىك قۇرالدارى قولدانىستاعى زاڭناماعا سايكەس تىركەلەتىن بولادى.
«قازىرگى تاڭدا «عارىشتىق تەحنيكا جانە تەحنولوگيالار»، «اەروعارىشتىق ينجەنەريا» ماماندىقتارى بويىنشا (باكالاۆريات، ماگيستراتۋرا، PhD) ماماندار دايارلاۋ كەلەسى جوعارى وقۋ ورىندارىندا جۇرگىزىلۋدە: ءال-فارابي اتىنداعى قازاق ۇلتتىق ۋنيۆەرسيتەتى، ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى، گ. داۋكەيەۆ اتىنداعى الماتى ەنەرگەتيكا جانە بايلانىس ۋنيۆەرسيتەتى، ق.ي. ساتبايەۆ اتىنداعى قازاق ۇلتتىق تەحنيكالىق ۋنيۆەرسيتەتى. سونىمەن بىرگە، ماماندار «بولاشاق» حالىقارالىق ستيپەندياسى جانە بايقوڭىر قالاسىنداعى ماسكەۋ اۆياسيالىق ينستيتۋتىنىڭ «ۆوسحود» فيليالى ارقىلى دايىندالادى»، – دەدى ۇكىمەت باسشىسى.
قازاقستاندىق عارىشكەرلەردىڭ قاتىسۋىمەن جۇزەگە اسىرىلاتىن حالىقارالىق عارىش باعدارلامالارىنا قاتىستى بەكتەنوۆ مۇنداي جوبالار ۇلتتىق جانە حالىقارالىق ماقساتتىلىققا بايلانىستى ىسكە اسىرىلاتىنىن اتاپ ءوتتى.
«ۇشۋعا قاتىسۋ تەك رەيستىڭ ءوزىن عانا ەمەس، عارىشكەردى دايارلاۋ، عىلىمي باعدارلاما، لوگيستيكا جانە ۇشۋدان كەيىنگى قىزمەتتى دە قامتيتىن ەلەۋلى قارجىلىق شىعىنداردى تالاپ ەتەدى. سوندىقتان ءتورتىنشى قازاقستاندىق عارىشكەردىڭ ۇشۋىن جۇزەگە اسىرۋ – وتە بايىپتى ءارى پراگماتيكالىق ءتاسىلدى قاجەت ەتەدى. ەگەر جوبا وزەكتىلىگى مەن نەگىزدىلىگى بويىنشا راستالسا، ءتيىستى شارالار حالىقارالىق مىندەتتەمەلەر مەن ەلدىڭ قارجىلىق-ەكونوميكالىق مۇمكىندىكتەرى اياسىندا بەلگىلەنگەن تارتىپپەن جۇزەگە اسىرىلادى»، – دەپ ءتۇسىندىردى پرەمەر-مينيستر.
