سىبايلاس جەمقورلىققا قارسى قىزمەت قايرات ساتىبالدىۇلىنا قاتىستى “قازاقتەلەكوم” اق، “كولىك سەرۆيس ورتالىعى” اق قاراجاتىن اسا ءىرى مولشەردە جىمقىرۋ، قىلمىستىق جولمەن الىنعان اقشانى جانە وزگە دە مۇلىكتى زاڭداستىرۋ، سونداي-اق كەدەندىك باجداردى تولەۋدەن جالتارۋ فاكتىلەرى بويىنشا قىلمىستىق ىستەردى تەرگەدى. انتيكور ونىڭ ناتيجەلەرىن جاريالادى، دەپ حابارلايدى Dalanews.kz.
تەرگەۋ بارىسىندا ق. ساتىبالدى ۇلى ءوز كىناسىن تولىق مويىندادى. زالالدى تولىق وتەدى جانە تەرگەۋگە كومەك بەردى.
جالپى، 2022 جىلدان باستاپ قازىرگە دەيىن ق. ساتىبالدى ۇلى جانە ونىمەن بايلانىستى تۇلعالاردان مەملەكەتكە زاڭسىز ساتىپ الىنعان 732،8 ملرد تەڭگە نەمەسە 1،6 ملرد اقش دوللارىنان استام سوماعا مۇلىكتىك اكتيۆتەر مەن اقشالاي قاراجات قايتارىلدى. ونىڭ ىشىندە 661،5 ملن اقش دوللارى شەتەلدەن تابىلدى، قىسقا مەرزىمدە قازاقستانعا قايتارىلدى. ق. ساتىبالدىۇلىمەن بەلسەندى ىنتىماقتاستىق ناتيجەسىندە اۆستريا، ليحتەنشتەين، ءباا، تۇركيا جانە ت. ب. ەلدەردەن قايتارىلدى.
"قايتارىلعان اكتيۆتەرگە اكىمشىلىك عيماراتتار، ەكسكليۋزيۆتى زەرگەرلىك بۇيىمدار، ليۋكس ۇيلەر، پاتەرلەر مەن اۆتوموبيلدەر، اكسيالار مەن كومپانيالاردىڭ ۇلەستەرى، تەمىرجول جولدارى مەن اقشا قاراجاتتارى كىرەدى، سونىڭ ىشىندە شەتەلدىكتەر دە بار"، - دەدى انتيكور.
ايتا كەتەرلىگى، قايتارىلعان اكتيۆتەردىڭ جالپى سوماسى 732،8 ملرد تەڭگەنى قۇرايدى، ولار:
- «قازاقتەلەكوم» اق اكسيالارىنىڭ 28،8% - 93،8 ملرد تگ.
- «كسو» اق – 30،2 ملرد تگ.
- 4 كومپانياداعى قاتىسۋ ۇلەسى – 10،3 ملرد تگ.
- قازاقستانداعى مۇلىكتىك اكتيۆتەر – 158،5 ملرد تگ.
- ەكسكليۋزيۆتى زەرگەرلىك بۇيىمدار – 105،39 ملرد تگ. (230 ملن.$)
- قازاقستاندىق شوتتارداعى اقشا – 36،8 ملرد تگ.
- اۆستريادان كەلگەن اقشا – 36،8 ملرد تگ. (82،1 ملن.$)
- ليحتەنشتەيننەن تۇسكەن اقشا – 116،7 ملرد تگ. (260،5 ملن.$)
- باا-نەن كەلگەن اقشا – 6،3 ملرد تگ. (14 ملن.$)؛
- تۇركيادان كەلگەن اقشا – 2،2 ملرد تگ. (4،92 ملن.$)؛
- باعالى قاعازداردى ساتۋ – 135،8 ملرد تگ. (300 ملن دوللار).
"ماسەلەن، قۇنى 158 ملرد تەڭگەدەن اساتىن 115 قازاقستاندىق وبەكت مەملەكەتتىك مەنشىككە بەرىلدى، ونىڭ ىشىندە 73 جىلجىمايتىن مۇلىك وبەكتىسى (13 ءۇي، 10 عيمارات، 13 جەر ۋچاسكەسى، 4 پاتەر، 3 عيمارات، قوسىمشا سالىنعان 2 مەدرەسە عيماراتى، 2 تۇراق ورنى، 25 ءۇي-جاي، 1 اياقتالماعان قۇرىلىس وبەكتىسى)، 37 جىلجىمالى مۇلىك وبەكتىسى (29 اۆتوماشينا، 5 ارنايى تەحنيكا، 3 كۆادروسيكل) جانە وزگە دە مۇلىك بار. مۇلىكتىڭ ءبىر بولىگى ونىڭ جاقىن تۋىستارىنا، اففيلييرلەنگەن تۇلعالارىنا جانە باقىلاۋداعى كومپانيالارعا راسىمدەلگەن"، - دەلىنگەن انتيكور حابارلاماسىندا.
استانا جانە الماتى قالالارىندا مەملەكەتكە بەرىلگەن اكىمشىلىك عيماراتتاردىڭ جالپى اۋدانى 180 مىڭ شارشى مەتردەن اسادى. بۇرىن بۇل اكتيۆتەر جالعا بەرىلىپ، جىل سايىن مەنشىك يەسىنە ميللياردتاعان تابىس اكەلگەن، مۇلىك ءقازىر مەملەكەتكە قايتارىلدى.
ليۋكس نىساننىڭ ءبىرى – اقمولا وبلىسىنىڭ باراپ اۋىلىندا جالپى اۋدانى 1،5 مىڭ شارشى مەتر، جەر ۋچاسكەسى 135 گەكتار بۇرىنعى ق. ساتىبالدى ۇلى رەزيدەنسياسى – استانا قالاسىنىڭ ءبىلىم باسقارماسىنا بەرىلدى.
بۇل قاراجاتتار مەملەكەتكە قايتارىلىپ، الەۋمەتتىك ماقساتتاردا پايدالانۋعا باعىتتالدى.
