قازاقستاننىڭ ەكس-پرەزيدەنتى نۇرسۇلتان نازاربايەۆتىڭ نەمەرە ءىنىسى قايرات ساتىبالدىنىڭ جازاسىن شەكتەۋ شاراسىنا اۋىستىرۋ تۋرالى ءوتىنىشى قاناعاتتاندىرىلدى، دەپ حابارلايدى Dalanews.kz.

بۇل تۋرالى وسكەمەن سوتى حابارلادى.

"وسكەمەن قالاسىنىڭ №2 سوتى سوتتالعان قايرات ساتىبالدىنىڭ جازاسىنىڭ وتەلمەگەن بولىگىن جازانىڭ نەعۇرلىم جەڭىل تۇرىنە اۋىستىرۋ تۋرالى ءوتىنىشحاتىن قارادى. قايرات ساتىبالدى مۇلكى تاركىلەنىپ، مەملەكەتتىك قىزمەت اتقارۋ قۇقىعىنان 10 جىلعا دەيىنگى مەرزىمگە ايىرىلا وتىرىپ، 6 جىلعا باس بوستاندىعىنان ايىرىلعان بولاتىن. سوتتالعان ءوزىنىڭ ءوتىنىشحاتىندا جازاسىنىڭ وتەلمەگەن بولىگىن نەعۇرلىم جەڭىل تۇرىنە اۋىستىرۋ تۋرالى ءوتىنىشحاتىن بەرۋ ءۇشىن زاڭنىڭ بارلىق تالاپتارىن ورىنداعانىن اتاپ كورسەتكەن"، - دەپ جازدى سوت.

ەسكە سالايىق، كۇنى كەشە ءماجىلىس دەپۋتاتى ەرمۇرات باپي بەلسەندى تۇردە اكتيۆتەرىن قايتارىپ جاتقان قايرات ساتىبالدى ۇلى بوستاندىققا شىعۋى مۇمكىن دەپ قاۋىپتەنىپ وتىرعانىن جەتكىزگەن ەدى.

بۇل تۋرالى دەپۋتات Facebook پاراقشاسىندا جازدى.

"ونى (ساتىبالدىۇلىن) مەرزىمىنەن بۇرىن شارتتى تۇردە بوساتۋعا نەمەسە امنيستيا جاساۋعا دايىنداپ جاتىر ما؟ ۇرلاعان اكتيۆتەرىن ءوز ەركىمەن قايتارىپ جاتقانى جاقسى. ءبىراق ول مەملەكەت قازىناسىنا تۇسە مە؟ رەسمي دەرەكتەرگە سەنۋ نە سەنبەۋ عانا قالدى. سەبەبى قايتارىلعان اكتيۆتەردى باقىلاپ وتىراتىن 100 پايىز مەملەكەتتىك كومپانيادا قوعامدىق باقىلاۋ جوق"، - دەيدى ەرمۇرات باپي.  

ايتا كەتەيىك، بۇعان دەيىن قايرات ساتىبالدىدان قايتارىلعان دۇنيە-مۇلىكتىڭ ءتىزىمى جاريالانعان بولاتىن.

سىبايلاس جەمقورلىققا قارسى قىزمەت قايرات ساتىبالدىۇلىنا قاتىستى “قازاقتەلەكوم” اق، “كولىك سەرۆيس ورتالىعى” اق قاراجاتىن اسا ءىرى مولشەردە جىمقىرۋ، قىلمىستىق جولمەن الىنعان اقشانى جانە وزگە دە مۇلىكتى زاڭداستىرۋ، سونداي-اق كەدەندىك باجداردى تولەۋدەن جالتارۋ فاكتىلەرى بويىنشا قىلمىستىق ىستەردى تەرگەدى. انتيكور ونىڭ ناتيجەلەرىن جاريالادى.

ايتا كەتەرلىگى، قايتارىلعان اكتيۆتەردىڭ جالپى سوماسى 732،8 ملرد تەڭگەنى قۇرايدى، ولار:

"قازاقتەلەكوم" اق اكسيالارىنىڭ 28،8% - 93،8 ملرد تگ.

"كسو" اق – 30،2 ملرد تگ.

4 كومپانياداعى قاتىسۋ ۇلەسى – 10،3 ملرد تگ.

قازاقستانداعى مۇلىكتىك اكتيۆتەر – 158،5 ملرد تگ.

ەكسكليۋزيۆتى زەرگەرلىك بۇيىمدار – 105،39 ملرد تگ. (230 ملن.$)

قازاقستاندىق شوتتارداعى اقشا – 36،8 ملرد تگ.

اۆستريادان كەلگەن اقشا – 36،8 ملرد تگ. (82،1 ملن.$)

ليحتەنشتەيننەن تۇسكەن اقشا – 116،7 ملرد تگ. (260،5 ملن.$)

باا-نەن كەلگەن اقشا – 6،3 ملرد تگ. (14 ملن.$)؛

تۇركيادان كەلگەن اقشا – 2،2 ملرد تگ. (4،92 ملن.$)؛

باعالى قاعازداردى ساتۋ – 135،8 ملرد تگ. (300 ملن دوللار).