كەشە ءبىر تانىسىم «قايرەكە ءسىز وپپوزيسيعا ءوتىپ كەتىپسىز عوي» دەيدى. ەندى ءبىرى «ءسىز ساياساتقا كەتتىڭىز بە؟» دەيدى. مەن ساياساتكەر ەمەسپىن. مەشىتتىڭ مىنبەرىندە، شاكىرتتەرگە ءدارىس ۇستىندە ساياسات تۋرالى ءسوز ايتپايمىن. ءدىندى ساياساتقا ارالاستىرمايمىن. مەشىتتە بيلىكتى ماقتاپ تا، داتتاپ تا ايتقان ەمەسپىن.
مەشىتتى ساياسي مىنبەگە، داۋ-دامايعا ارالاستىرۋعا بولمايدى. مەشىتكە ءارتۇرلى ساياسي كوزقاراستاعى ادامدار كەلەدى. سوندىقتان ول جەردە ورتاق قۇندىلىقتار عانا ايتىلۋى كەرەك. بۇل مەنىڭ ۇستانىمىم.
ءبىراق باسقا ۋاقىتتا ادىلدىكتى سۇراۋ، قاتەلىكتى كورسەتۋ ءاربىر ۇلتىن، ەلىن، مەملەكەتىن سۇيەتىن ادامنىڭ پارىزى. اباي «جانە حاق جولى وسى دەپ ادىلەتتى» دەپ ادىلدىكتى ءسۇيۋدى ءۇش يماني گۇلدىڭ نەگىزىنە جاتقىزعان.
عالىم-اكادەميكتەرىمىز، اقىن-جازۋشىلارىمىز، جۇلدىز انشىلەرىمىز، ۇيىقتاپ وتىرعان دەپۋتاتتارىمىز ماداقتى قويىپ بيلىك باسىنداعىلاردىڭ قاتەلىگىن كورسەتىپ، ادىلەتسىزدىكتەردى اشىق ايتا بىلگەندە كوپتەگەن كەلەڭسىز جايتتاردىڭ الدىن الۋعا بولادى.
بۇگىنگى قازاق ەلى باسقا دەڭگەيدە بولار ەدى. ازاماتتىق پىكىرىن بىلدىرگەن ادامداردى مەملەكەتشىل نەمەسە وپپوزيسيونەر دەپ ءبولۋ دۇرىس پا؟
دامەتكەن مانسابى، تەندەرلى بيزنەسى، ءان ايتاتىن ساحناڭ ءۇشىن نە ايتسا دا «ءلاببايلاپ» باس شۇلعىپ، رەتى كەلسىن كەلمەسىن «ەلباسىلاپ» تۇرساڭ مەملەكەتشىل جاقسى ازاماتسىڭ.
ال كوپەكورنەۋ جاسالىپ جاتقان ادىلەتسىزدىكتى ايتىپ، حالىقتىڭ قازىناسىن توننالاپ توناپ جاتقاندارعا قارسى شىعىپ، پىكىر بىلدىرسەڭ، بۇلىكشىل وپپوزيسيونەرسىڭ نەمەسە حايپ قۋعان ءپوپۋليستسىڭ. بۇل قانداي قيسىق قيسىن؟!
قاتەلىكتى ايتىپ، جامانشىلىقتى جاريا ەتۋ ارقىلى ونىڭ الدىن الۋ جانە قاجەت كەزدە بيلىكتىڭ جاقسى قادامدارىن «بارەكەلدى» دەپ قولداۋ ناعىز مەملەكەتكە جاناشىر، پاتريوت ادامنىڭ ارەكەتى.
ال وزىندىك پىكىرى جوق، ماداق پەن جاعىمپازدىقتى كاسىپ ەتكەندەر مەملەكەتشىلدىك بىلاي تۇرسىن، ەل ءۇشىن ەڭ ءقاۋىپتى ەكى ءجۇزدى ادامدار مىنە سولار.
ءبىراق ەلىمىزدە وكىنىشكە وراي، وسىندايلاردىڭ ايى وڭىنان تۋىپ تۇر. سەبەبى...
