بەلگىلى قارجى ساراپشىسى اتىراۋ مۇناي وڭدەۋ زاۋىتىنىڭ رەسەيگە ساتىلۋى مۇمكىن ەكەنىنە قاتىستى پىكىر ءبىلدىردى، دەپ حابارلايدى Dalanews.kz.
رىسمامبەتوۆ ەگەر قازىردەن باستاپ جوندەۋ جۇمىستارىن باستاماساق، كەيىن ونى بيۋدجەت ەسەبىنەن «جاماۋعا» تۋرا كەلەتىنىن ايتتى.
"بۇل جەردە ەشقانداي سەرپىلىس بولمايدى. جاڭا تەحنولوگيالار تۋرالى ۇمىتا تۇرا بەرىڭىز. مەن دە بۇل جاعدايعا قىنجىلدىم. تانىس-تامىرلارمەن سويلەستىم. سويتسەم، بۇل كەلىسىمگە بايلانىستى نەگىزىنەن زاڭگەرلەر مەن مەنەدجەرلەر نارازى ەكەن. ال ينجەنەرلەر ونشا شۋلامايدى. نەگە؟"، دەيدى راسۋل رىسمامبەتوۆ.
ونىڭ سوزىنشە، مۇنىڭ ەكى سەبەبى بار:
بىرىنشىدەن، قازاقستاندا وسى سالادا تولىق وندىرىستىك سيكلدى تۇسىنەتىن ينجەنەرلەر وتە از.
"ءيا، بار، ءبىراق ولار كوبىنە تەك بار جابدىقتى ۇستاپ تۇرۋمەن اينالىسادى. جاڭا تەحنولوگيامەن، جاڭا قۇرىلعىمەن جۇمىس ىستەۋدى بىلەتىندەر از. ال ونداي مىقتى ينجەنەرلەر بولسا، ولار باياعىدا شەتەلگە كەتىپ قالعان. ءقازىر جاقسى لاۋازىمداردا سول جاقتا جۇمىس ىستەپ ءجۇر"، دەيدى قارجىگەر.
ەكىنشىدەن، ينجەنەرلەر «تاتنەفت» جامان سەرىكتەس ەمەس ەكەنىن ءتۇسىنىپ وتىر.
"ەگەر ءبىز ءاموز-دى «تاتنەفتتىڭ» كومەگىمەن قالپىنا كەلتىرىپ، ارتىنشا ءتورتىنشى مۇناي وڭدەۋ زاۋىتىن (شەتەلدىك تەحنولوگيامەن) سالۋعا كىرىسسەك – بۇل ۇلكەن جەتىستىك بولار ەدى"، دەيدى رىسمامبەتوۆ.
سونىمەن قاتار، قارجىگەر ستراتەگيالىق نىسانداردىڭ ساتىلۋىنا قاتىستى پىكىر ءبىلدىردى.
"ستراتەگيالىق نىسانداردى ساتقانىمىز جاقسى ما؟ ارينە، ول دۇرىس ەمەس. ءبىراق ودان شىعاتىن جول بار ما؟ بار. ول – ءوز ينجەنەرلەرىمىزدى دايارلاۋ. بىزدە ونداعان جىلدار بويى سۇرانىس بولماعان ماماندار كەرەك بوپ تۇر"، دەيدى مامان.
قارجىگەردىڭ سوزىنشە، قازاقستانداعى كوپتەگەن نىسان وسى كۇيدى كەشىپ وتىر.
"مىسالى، مەتاللۋرگتەر ESG باعدارلاماسى اياسىندا زاۋىتتارىن جاڭارتقىسى كەلگەن. ءبىراق ولار بۇل پروسەستى مەملەكەت ەسەبىنەن جانە جەڭىلدەتىلگەن باعامەن جاساعىسى كەلدى. ال شىنتۋايتى مىناۋ – بىزدەگى كوپتەگەن ينفراقۇرىلىم ءشىرىپ تۇر، كەز كەلگەن كۇنى ىستەن شىعۋى مۇمكىن.
كەيبىر جەو-لاردا (جىلۋ ەلەكتر ورتالىقتارىندا) ۇزاق جىلدار بويى ىستەگەن "سەرىك اعا" نەمەسە "ميحالىچتار" 78-80 جاسىندا زەينەتكە شىعىپ كەتەدى دە – ورنىندا ەشكىم قالمايدى، بۇل جۇيەنىڭ قالاي جۇمىس ىستەيتىنىن ەشكىم تۇسىنبەيدى"، دەيدى قارجىگەر.
راسۋل رىسمامبەتوۆتىڭ سوزىنشە، مەملەكەتتىك اپپاراتتا دا ءدال وسىنداي جاعداي بايقالادى. ءبىراق ول جەردە بۇل كوزگە ونشا كورىنبەيدى.
"شەشىمى قانداي؟ شەشىم – جوق. مەملەكەتتىڭ ساپاسىن باياۋ، ءبىراق تۇراقتى تۇردە قالپىنا كەلتىرۋ.
باياۋ رەفورمالار، ويتكەنى رەفورمالار قابىلدانسا، وقيعا «قاڭتارمەن» اياقتالۋى مۇمكىن. ماشينانى تەز ايداۋ ءۇشىن – ۇلكەن تاجىريبە كەرەك. ءبىراق سونىڭ وزىندە جول اپاتىنا تۇسەتىندەر بار.
وسىلاي ەل بولامىز. مەن ءوز بولجامىمدى وزگەرتەمىن: 5 جىلدىق قيىن ءومىر ەمەس، ەندى 7–10 جىل قيىن ءومىر دەپ ەسەپتەيمىن. ءبىراق العاشقى ناتيجەلەردى 2–3 جىلدان سوڭ كورە باستايمىز. جەڭىسكە جىلدام جەتۋ مۇمكىن ەمەس. ءبارى قيىن جول ارقىلى كەلەدى"، دەپ ءسوزىن تۇيىندەدى قارجىگەر.
