ىشكى ىستەر ءمينيسترى ەرجان سادەنوۆ جۇبايى سالتانات نۇكەنوۆانى ۇرىپ ءولتىرىپ ايىپتالعان بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتىڭ قانداي جاعدايدا قاماۋدا وتىرعانىن ايتتى، – دەپ حابارلايدى Dalanews.kz.
سادەنوۆتىڭ ايتۋىنشا، بيشىمبايەۆ وزگە ايىپتالۋشىلارمەن بىرگە ورتاق كامەرادا وتىر. سونىمەن قاتار وعان ەشقانداي ارتىق جاعداي جاسالماعانىن العا تارتتى.
– ول تەرگەۋ ءۇشىن قاماۋعا الىنعاندىقتان وزگەلەرمەن بىرگە ورتاق كامەرادا وتىر. بيشىمبايەۆقا ارتىق جاعداي جاسالعان جوق، – دەدى مينيستر.
بۇدان باسقا مينيستر بيشىمبايەۆتىڭ دەنساۋلىعى قالىپتى ەكەنىن، ورتاق ءتارتىپتى بۇزباعانىن دا تىلگە تيەك ەتتى.
وسىعان دەيىن الەۋمەتتىك جەلىدە تەرگەۋدە وتىرعان بيشىمبايەۆقا ارتىق جاعداي جاسالىندى دەگەن قاۋەسەت اڭگىمە تاراعان ەدى.
بۇگىن ق ر ىشكى ىستەر ءمينيسترى ەرجان سادەنوۆ ءبارىن جوققا شىعارىپ، ونىڭ زاڭ اياسىندا تەرگەلىپ جاتقانىن مالىمدەدى.
ەستەرىڭىزگە سالامىز، وتكەن جىلدىڭ 9 قاراشاسىندا ءوز ايەلىن ۇرىپ ءولتىردى دەگەن كۇدىكپەن بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ۇستالعان بولاتىن. بۇدان كەيىن پوليسيا بيشىمبايەۆتىڭ اعاسى سالتانات نۇكەنوۆانى ولتىرۋگە قاتىسى بار دەگەن كۇدىكپەن ونى دا قاماۋعا الدى.
