قازاقستاننىڭ باس پروكۋراتۋراسى شەشەنستاندىق بەلسەندى مانسۋر موۆلايەۆقا قاتىستى جاعدايعا تۇسىنىكتەمە بەردى. ۆەدومستۆونىڭ حابارلاۋىنشا، رەسەي ازاماتى مانسۋر موۆلايەۆ 2025 جىلعى 13 مامىردا الماتىدا ۇستالعان، دەپ حابارلايدى Dalanews.kz.
"م. موۆلايەۆ رف شەشەنستان رەسپۋبليكاسى شالين اۋدانى پوليسياسى جاريالاعان حالىقارالىق ىزدەۋ نەگىزىندە ۇستالدى. وعان رف قىلمىستىق كودەكسىنىڭ 163-بابىنىڭ 1-بولىگى جانە 163-باپتىڭ 2-بولىگى "گ" تارماعى بويىنشا (ەكى ەپيزود بويىنشا بوپسالاۋ) قىلمىس جاسادى دەگەن ايىپ تاعىلعان"، – دەپ حابارلادى باس پروكۋراتۋرا Tengrinews.kz-كە بەرگەن جاۋابىندا.
16 مامىردا الماتى قالاسىنىڭ مامانداندىرىلعان تەرگەۋ سوتى موۆلايەۆقا قاتىستى 40 تاۋلىككە ۋاقىتشا قاماۋعا الۋ سانكسياسىن شىعارعان.
مانسۋر موۆلايەۆ قازاقستان بيلىگىنەن باسپانا سۇراعان. باس پروكۋراتۋرانىڭ مالىمەتىنشە، ونىڭ ءوتىنىشى قارالىپ جاتقان كەزدە ەكستراديسيا جاسالمايدى.
"بوسقىندار تۋرالى" ق ر زاڭىنا سايكەس، باسپانا ىزدەۋشى تۇلعالار بوسقىن مارتەبەسىن بەرۋ تۋرالى ءوتىنىش قاراۋ ءراسىمى اياقتالعانعا دەيىن، سونداي-اق شاعىمدانۋ مەرزىمى ىشىندە قازاقستان اۋماعىندا بولۋعا قۇقىلى. موۆلايەۆ م. الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنا بوسقىن مارتەبەسىن بەرۋ تۋرالى ءوتىنىش ءبىلدىردى. وسى ورگان 2025 جىلعى 21 مامىردا وعان باسپانا ىزدەۋشى تۇلعا كۋالىگىن بەرگەن. سوندىقتان ەكستراديسيا ماسەلەسى بۇل ءوتىنىش بويىنشا تۇپكىلىكتى شەشىم قابىلدانعاننان كەيىن عانا قارالۋى مۇمكىن"، – دەدى قاداعالاۋشى ورگان.
مانسۋر موۆلايەۆ 1995 جىلعى 12 جەلتوقساندا دۇنيەگە كەلگەن. بەلگىلى بولعانداي، ول ءوز ەلىندە وپپوزيسيالىق قوزعالىسقا قاتىسىپ، شەشەنستانداعى قۋعىن-سۇرگىن مەن ءىز-تۇزسىز جوعالعاندار تۋرالى مالىمەتتەر جيناعان. بۇعان دەيىن موۆلايەۆ ەسىرتكىگە بايلانىستى قولدان جاسالعان ءىس بويىنشا ەكى جىل تۇرمەدە وتىرعانىن مالىمدەگەن. كەيىن ول قىرعىزستانعا قاشىپ، سودان كەيىن قازاقستانعا وتكەن.
ادۆوكاتتارىنىڭ ايتۋىنشا، موۆلايەۆ شەشەنستان تۇرمەسىندە ازاپتاۋعا ۇشىراعان. وسىنى انىقتاۋ ءۇشىن ولار ستامبۇل حاتتاماسىنا سايكەس، پسيحولوگ ماماندى تارتقان.
"2022 جىلى قورعاۋىمىزداعى ازاماتقا ازاپتاۋ قولدانىلعان. ارينە، بىزدە بۇل جاعدايدىڭ بولعانىن راستايتىن ناقتى دالەلدەر جوق. مانسۋر سولاي دەيدى – ءبىز، ادۆوكاتتار، وعان سەنەمىز. ءبىراق ليسەنزيالانعان پسيحولوگ مامان ونى قاراپ، بۇل جاعدايدىڭ شىن بولعان-بولماعانىن انىقتاپ كورسە دەيمىز. بۇل ازاپتاۋعا قاتىستى ادەتتەگى جۇمىس. مۇنداي دالەلدەرگە باعانى سوت بەرەدى. ءبىزدىڭ ماقسات – وسى زەرتتەۋدى الۋ. سەبەبى بۇل ماتەريالدى موۆلايەۆقا بوسقىن مارتەبەسىن بەرۋ تۋرالى شەشىم قابىلداناتىن كوميسسيادا جانە حالىقارالىق ورگاندارعا جۇگىنۋدە پايدالانعىمىز كەلەدى"، – دەدى ادۆوكات رەنا كەريموۆا.
الايدا مامانعا الماتى ۋاقىتشا ۇستاۋ يزولياتورىندا موۆلايەۆپەن كەزدەسۋ مۇمكىندىگى بەرىلمەگەن.
