– ءبىز مەملەكەتتىك ناگرادالار جۇيەسىن دە وزگەرتۋىمىز كەرەك. كوپتەگەن مەملەكەتتىڭ وردەن-مەدالدارىنا كورنەكتى تۇلعالاردىڭ ەسىمى بەرىلگەن. مۇنداي قادامدار وتانشىلدىق رۋحتى اسقاقتاتۋ ءۇشىن قاجەت.
سونداي-اق، تاريحتا وشپەس ءىز قالدىرعان ايگىلى ادامداردىڭ ەسىمىن ۇرپاق ساناسىنا ءسىڭىرۋ ءۇشىن كەرەك. مەملەكەتتىك ناگرادالار جۇيەسىن جەتىلدىرۋ كەزىندە بۇل تاجىريبەنى بايىپپەن پايدالانعان ءجون.
قولدانىستاعى كەيبىر وردەندەردى حالقىمىزدىڭ ءبىرتۋار پەرزەنتتەرىنىڭ ەسىمىمەن اتاۋ ماسەلەسىن ويلاستىرۋ قاجەت.
مىسالى، بەيبارىس سۇلتان جانە باسقا دا تاريحي تۇلعالار اتىنداعى وردەننىڭ يەگەرى اتانۋ كىم-كىمگە دە زور مارتەبە بولار ەدى. مەن بۇعان دەيىن «ەل بىرلىگى» اتتى جاڭا مەملەكەتتىك ناگرادا ازىرلەپ، بەكىتۋدى تاپسىردىم.
الداعى رەسپۋبليكا كۇنىندە بۇل ماراپات العاش رەت تاپسىرىلادى. كەلەسى جىلعى رەسپۋبليكا كۇنىندە تاريحي تۇلعالاردىڭ اتىمەن اتالعان وردەندەردى تابىستايمىز.
جىل سوڭىنا دەيىن وسى ماسەلەنى مۇقيات ساراپتاپ، ناقتى ۇسىنىس ەنگىزۋ قاجەت. پرەزيدەنت اكىمشىلىگى بۇل جۇمىستى قۇزىرلى مەملەكەتتىك ورگاندارمەن، عالىمدارمەن جانە ساراپشىلارمەن بىرگە اتقارادى، – دەدى مەملەكەت باسشىسى قۇرىلتاي جيىندا.
سوىنمەن قاتار پرەزيدەنتىمىز جيىندا قازاقستاننىڭ اكادەميالىق ۇلگىدەگى جاڭا تاريحىن جازۋ ماسەلەسىنە دە نازار اۋداردى.
– ۇلتىمىزدىڭ تاريحي سانا-سەزىمىن جاڭعىرتۋ وتە ماڭىزدى. دامىعان مەملەكەتتىڭ ءبارى تولىق زەرتتەلگەن ءتول شەجىرەسىن دارىپتەۋگە ايرىقشا ءمان بەرەدى. بۇل ىستە ەل تاريحىنىڭ كوپ تومدىق جيناعى باستى ءرول اتقارادى. قازاقستان تاريحىنىڭ جاڭا عىلىمي ۇستانىمدارعا ساي ازىرلەنگەن كوپ تومدىق جيناعى ءالى كۇنگە دەيىن جارىققا شىققان جوق.
وكىنىشكە قاراي، ستراتەگيالىق ماڭىزى بار وسى ماسەلە تاۋەلسىزدىك جىلدارىندا تولىق شەشىمىن تاپپادى. سوندىقتان، مەن «تاۋەلسىزدىك بارىنەن قىمبات» اتتى ماقالامدا وسىعان ارنايى توقتالدىم. قازاقستاننىڭ اكادەميالىق ۇلگىدەگى جاڭا تاريحىن جازۋ تۋرالى باستاما كوتەردىم. بۇل جۇمىسقا ەلىمىزدىڭ جانە شەتەلدىڭ ءبىر توپ عالىمدارى جۇمىلا كىرىستى.
ەجەلگى زاماننان بۇگىنگە دەيىنگى ارالىقتى قامتيتىن جەتى تومدىق جيناقتى ازىرلەۋ ءۇشىن ءبىراز شارۋا اتقارىلدى. جينالعان ماتەريالعا ەندى ستيليستيكالىق جانە عىلىمي رەداكسيا جاسالۋى كەرەك.
سونداي-اق، جيناقتى ءبىرىڭعاي ۇلگىدە بەزەندىرگەن ءجون. ەڭبەكتە وسىعان دەيىن جىبەرىلگەن تۇجىرىمدامالىق قاتەلىكتەر مەن كەمشىلىكتەر قايتالانباۋى قاجەت. وعان سوڭعى كەزدە اشىلعان تاريحي جاڭالىقتار تۇگەل ەنگىزىلۋى كەرەك. قاراما-قايشى مالىمەتتەر بولماۋعا ءتيىس، – دەدى قاسىم-جومارت كەمەل ۇلى.
