ايگىلى فرانسۋز كوميگى، اكتەر پەر ريشار ماسكەۋ تۇرعىندارى ءۇشىن «پەر ريچارد III» دەپ اتالاتىن مونوسپەكتاكلىنىڭ العاشقى تانىستىرىلىمىن وتكىزبەكشى.
اكتەردىڭ ءوز ءومىرى جايىندا باياندالاتىن مونوسپەكتاكل ماسكەۋدەگى «كوسموس» كونسەرت زالىندا وتەدى دەپ كۇتىلۋدە. قويىلىم قارساڭىندا جۋرناليستەرمەن جۇزدەسكەن اكتەر قويىلىمدا ءوز ءومىرىن، ەتجاقىن ادامدارى، ساحناداعى ارىپتەستەرى جايىندا سىر شەرتەتىنىن العا تارتقان. سونىمەن قاتار ول سپەكتاكل بارىسىندا جەكە مۇراعاتىنداعى جۇرت نازارىنا ۇسىنىلماعان بەينەماتەريالداردى دا كورسەتەتىنىن ايتتى.
«پەر ريچارد III» قويىلىمى كومەديالىق جانە درامالىق جانرلار قاتار جۇرەتىن – وتكەندى ەسكە تۇسىرەتىن سپەكتاكل دەپ قاراستىرۋ كەرەك ەكەنىن العا تارتتى.
ول مونوسپەكتاكلىن قىرىمدا دا قويۋدى جوسپارلاعان-دى. ءبىراق بۇدان ساياسي استار ىزدەۋشىلەر كوبەيگەن سوڭ، ول قىرىمعا بارۋدان باس تارتىپتى. بۇگىندە كينو سالاسىندا تانىلىپ، مول قارجىعا كەنەلگەن فرانسيانىڭ ونەر ادامدارى رەسەيدەن شىقپايتىنى جاسىرىن ەمەس. الداعى ۋاقىتتا پەر ريشار دا ونەردەگى ارىپتەسى جەرار دەپاردە سياقتى رەسەي ازاماتتىعىن الىپ جاتسا، تاڭعالمايمىز.
"قمد" اقپارات
