پاريجدە الەمدەگى ەڭ ءىرى مۇراجاي لۋۆردى توناپ كەتتى، دەپ حابارلايدى Dalanews.kz.

وقيعا مۇراجاي اشىلعانعا دەيىن بولعان. الدىن الا دەرەكتەرگە قاراعاندا، بەتپەردە كيگەن ءۇش ەر ادام قۇرىلىس ءجۇرىپ جاتقان تەحنيكالىق كىرەبەرىس ارقىلى عيماراتقا كىرىپ، سىرتقى جۇك ليفتىمەن كوتەرىلگەن. ولار تەرەزەلەردى سىندىرىپ، يمپەراتورلىق اشەكەيلەر ساقتالعان اپوللون گالەرەياسىنا وتكەن.

قىلمىسكەرلەر ناپولەون مەن يمپەراتريسا جوزەفيناعا تيەسىلى كوللەكسيادان توعىز زەرگەرلىك بۇيىمدى ۇرلاپ كەتكەن. ولاردىڭ ىشىندە ءتاج، بروش، القا جانە باسقا دا اشەكەيلەر بار. ەڭ قىمبات ەكسپوناتتاردىڭ ءبىرى – سالماعى 140 كاراتتان اساتىن «رەگەنت» الماسى ورنىندا قالعان.

Le Parisien باسىلىمىنىڭ مالىمەتىنشە، ۇرلانعان بۇيىمداردىڭ ءبىرى – يمپەراتور ناپولەون ءىىى-نىڭ جارى ەۆگەنيانىڭ تاجىنە ۇقساس اشەكەي – مۇراجاي ماڭىنان سىنعان كۇيدە تابىلعان.

وقيعادان كەيىن قىلمىسكەرلەر سكۋتەرمەن قاشىپ كەتكەن. زارداپ شەككەندەر جوق، الايدا مۇراجاي «ەرەكشە جاعدايلارعا» بايلانىستى كەلۋشىلەر ءۇشىن جابىلدى. فرانسيانىڭ مادەنيەت ءمينيسترى راشيدا داتي وقيعا ورنىنا بارىپ، تەرگەۋ ءجۇرىپ جاتقانىن جانە كەلتىرىلگەن زالالدى ساراپشىلار ەسەپتەپ جاتقانىن راستادى.

تاريحي كونتەكست

تاريحشىلار بۇل ۇرلىقتى «مونا ليزانىڭ» جوعالۋىنان بەرى بولعان ەڭ ءىرى ۇرلىق دەپ باعالاپ وتىر.
1911 جىلدىڭ 21 تامىزىندا مۇراجاي قىزمەتكەرى ۆينچەنسو پەرۋدجا لەوناردو دا ءۆينچيدىڭ ايگىلى كارتيناسىن پالتوسىنىڭ استىنا جاسىرىپ، عيماراتتان سابىرمەن شىعىپ كەتكەن. تۋىندى تەك ەكى جىلدان كەيىن فلورەنسيادا ساتقان كەزدە تابىلعان. ءدال وسى وقيعا «دجوكوندانى» بۇكىل الەمگە ايگىلى ەتكەن.

ءار جىلدارى لۋۆردا ۇساق ونەر تۋىندىلارى مەن ارتەفاكتىلەردىڭ جوعالۋى سياقتى وقيعالار تىركەلگەن، ءبىراق ولار كەيىن ىشكى تەكسەرۋلەر كەزىندە تابىلىپ وتىرعان. مىسالى، XVIII عاسىرداعى ساعاتتار مەن كونە مۇسىنشەلەردىڭ ۇرلانۋ ارەكەتتەرى بولعان.

الايدا بۇگىنگى توناۋ سياقتى اۋقىمدى وقيعا لۋۆر تاريحىندا بۇرىن-سوڭدى بولماعان.

ايتا كەتەيىك، لۋۆر جىل سايىن توعىز ميلليوننان استام كەلۋشىنى قابىلدايدى جانە الەمدىك مادەني مۇرانىڭ ەڭ قۇندى كوللەكسيالارى ساقتالعان.