وزبەكستان بيلىگى رەسەي باسقاراتىن ەكونوميكالىق بلوكقا كىرۋ-كىرمەۋ تۋرالى شەشىم قابىلداماس بۇرىن، ۇيىمعا باقىلاۋشى بولاتىنىن مالىمدەدى.

ەۋرازيالىق ەكونوميكالىق وداقتى (ەاەو) رەسەي 2015 جىلى بەلارۋس جانە قازاقستانمەن بىرگە قۇردى. كەيىن ۇيىمعا ارمەنيا مەن قىرعىزستان كىردى. بۇرىنعى سوۆەتتىك تاعى ءبىر رەسپۋبليكا – مولدوۆا ۇيىمعا باقىلاۋشى بولىپ تىركەلگەن.

بلوك ۇيىم اياسىندا ەركىن ساۋدا جاساپ، كاپيتال الماسۋعا ۇمتىلادى، ءبىراق ونىڭ ءبىرقاتار مۇشەسى ساۋدا شەكتەۋلەرىنە سىن ايتىپ ءجۇر.

ەاەو وزبەكستاندى دا ۇيىمعا قوسىپ العىسى كەلەدى. يسلام كاريموۆ بيلىگى كەزىندە تاشكەنت بلوكقا ۇمتىلمادى.

باقىلاۋشىلاردىڭ ايتۋىنشا، پرەزيدەنت شاۆكات ميرزيايەۆ بيلىككە كەلگەن سوڭ، وزبەكستان-رەسەي قارىم-قاتىناسى جىلي باستادى. ميرزيايەۆ ەلگە شەتەل ينۆەستيسياسىن تارتقىسى كەلەدى.

34 ميلليون حالقى بار وزبەكستان ۇيىمعا كىرگەن جاعدايدا، ول ەكونوميكالىق وداقتىڭ رەسەيدەن كەيىنگى تۇتىنۋ نارىعى ۇلكەن ەلگە اينالادى.

24 قاڭتاردا ميرزيايەۆ پارلامەنتكە جولداۋىندا ۇكىمەت "ەۋرازيالىق ەكونوميكالىق وداقپەن ارىپتەس بولۋ جولدارىن زەرتتەپ جاتقانىن" مالىمدەگەن.