«توچيكيستون» اپتالىق گازەتىنىڭ باس رەداكتورى ءارى قۇرىلتايشىسى شاريف حامدامپۋر گازەتتى باسىپ شىعارۋدى توقتاتۋ «كپ» گازەتىنىڭ ماسكەۋلىك ءتىلشىسى سەرگەي پونوماريەۆتىڭ ماقالاسىمەن بايلانىستىردى. حامدامپۋر ون جىلدان بەرى رەسەيلىك گازەتتىڭ تاجىكستاندا شىعارىلۋىنا جاۋاپتى بولىپ كەلدى.
پونوماريەۆ تاجىكستانعا ساپارى تۋرالى ماقالاسىن «تاجىكستان: سوۆەتتىك اۋرە سارساڭنان جارقىن بولاشاققا دەيىن» دەپ اتاپ، ورتالىق ازياداعى وسى مەملەكەتتى «راۆشان مەن جامشۋتتىڭ ەلىنە» تەڭەگەن. ماقالا بىلاي باستالادى: «ماسكەۋدەن كونە حودجەنتكە دەيىنگى ۇشاقتا... سلاۆيان ۇلتىنان مەنىڭ الپەتىم عانا جارقىراي كورىنەدى. قالعاندارى – وڭكەي راۆشاندار مەن جامشۋتتەر».
شاريف حامدامپۋر، 21 شىلدەدە دۋشانبەدە وتكىزگەن باسپا ءسوز ءماسليحاتىندا، بۇل ماقالانى تاجىك حالقىن كەمسىتەدى دەپ ەسەپتەيتىنىن ايتتى. سول سەبەپتى «ءبىز بۇل گازەتتىڭ ەلىمىزدە باسىپ شىعارۋدى توقتاتۋ تۋرالى شەشىم قابىلدادىق»، دەدى ول.
10 جىل بويى تاجىكستاندا رەسەيلىك «كومسومولسكايا پراۆدا» جانە «ارگۋمەنتى ي فاكتى» گازەتتەرى باسىلىپ كەلدى.
"قمد" اقپارات
