تەمىرلان اۋىلىنىڭ ىرگەسىندەگى قارقىندى الما جانە جەمىس-جيدەك داقىلىن وتىرعىزۋمەن اينالىساتىن «كازگاردەن» باۋ شارۋاشىلىعىنىڭ جەمىس القابى 60 گەكتاردان اسادى.
اگرارلىق سالا - اۋدان ەكونوميكاسىنىڭ قوزعاۋشى كۇشى. سوندىقتان اۋدان اكىمى باعلان باتىرشايەۆتىڭ تاراپىنان اۋىل شارۋاشىلىق سالاسىنداعى جاڭا جوبالارعا، اۋدانعا ينۆەستيسيا سالعان جەكە كاسىپكەرلەرگە بارىنشا قولداۋ كورسەتىلۋدە.
بۇگىندە اتالعان شارۋاشىلىق 11 گەكتارعا قارقىندى الما، 49 گەكتار القاپقا سۇيەكتى جەمىس داقىلدارىن وتىرعىزعان. جوبانىڭ ينۆەستيسيالىق قۇنى 450 ميلليون تەڭگەنى قۇرايدى. مۇنان بولەك، جەكە كاسىپكەر باۋ-باقشا اۋماعىن كەڭەيتىپ، 2 ميلليارد تەڭگەگە 240 گەكتارعا باۋ وتىرعىزۋدى جوسپارلاپ وتىر. قازىرگى تاڭدا وندا 60 ادام تۇراقتى جانە ماۋسىمدىق جۇمىسپەن قامتىلعان.
ءبورجار اۋىلدىق وكرۋگىنە قاراستى «BalKausar» باۋ شارۋاشىلىعىندا ءجۇزىمنىڭ ەليتالىق اسحانالىق سورتى وسىرىلەدى. جاڭا تەحنولوگيانى قولدانۋ ارقىلى قىسقا ۋاقىت ىشىندە مول ءونىم الۋدى كوزدەيتىن شارۋاشىلىق ازىرگە 10 گەكتار القاپقا اسحانالىق ءجۇزىم سورتىن جەرسىندىرگەن. بىلتىر قىركۇيەك ايىندا ەگىلگەن ءجۇزىم كوشەتتەرى ءوسىپ، جەمىس بەرگەن جاعدايدا جىلىنا 250 توننا ءونىم الىنادى دەپ جوسپارلانۋدا.
