ورازا – رۋحاني تازارۋ ايى عانا ەمەس، قارجىلاي ساۋاتىمىزدى ارتتىرىپ، اقشامەن ارا-قاتىناسىمىزدى رەتتەيتىن كەرەمەت كەزەڭ. بايقاساڭىز، ءدال وسى ءبىر ايدا ادامداردىڭ كوبى شىعىندارىن ەرىكسىز قىسقارتادى، قاجەتسىز دۇنيەلەردەن باس تارتادى.
مۇنى ناقتى ەسەپپەن تارقاتىپ كورەيىك. مىسالى، ورازاعا دەيىنگى كۇندەلىكتى قارجىلاي ادەتتەرىمىزدى الايىق. ادەتتە ءبىر ادام كۇنىنە ەكى رەت سىرتتان تاماق ىشسە، ورتا ەسەپپەن ءبىر تاماقتانۋى 2000-2500 تەڭگە دەپ ەسەپتەگەندە، ءبىر كۇندە 5000 تەڭگە جۇمسايدى. ءبىر ايدا بۇل سوما 150 000 تەڭگەگە جەتەدى. ورازا كەزىندە بۇل شىعىن بىردەن قىسقارادى. سەبەبى كەشكە ۇيدە جاسالعان اس الدەقايدا ارزانعا تۇسەدى. ءتىپتى ۇيدە اۋقاتتانۋدىڭ ءوزىن كۇنىنە 1500 تەڭگەگە ەسەپتەسەك، 30 كۇندە 45 000 تەڭگە كەتەدى. سوندا ءبىر عانا تاماقتانۋدىڭ وزىنەن 105 000 تەڭگە ۇنەمدەلەدى.
سونىمەن قاتار ورازا كەزىندە ادامدار كوبىنە كوڭىل كوتەرۋ شارالارىنا بارۋدى ازايتادى. ماسەلەن، كينو، كافە نەمەسە باسقا دا ويىن-ساۋىققا اپتاسىنا 1 رەت بارساڭىز، ورتا ەسەپپەن 10 000 تەڭگە جۇمسايسىز دەلىك. ايىنا – 40 000 تەڭگە. ورازا ايىندا بۇل ادەتتى ۋاقىتشا دوعارا تۇرىپ، ورنىنا تەگىن، پايدالى ءىس-شارالار نەمەسە رۋحاني مازمۇنداعى كەزدەسۋلەرگە قاتىسۋعا بولادى. وسى ارقىلى قوسىمشا تاعى 40 000 تەڭگە قالتاڭىزدا قالادى.
ەندى، تاعى ءبىر نازار اۋداراتىن شىعىن – كوفە مەن تاتتى-دامدىلەرگە كەتەتىن قاراجات. كۇن سايىن كوفەحانادان كەم دەگەندە ءبىر شىنى كوفە الاتىن بولساڭىز، باعاسى شامامەن 1000-1200 تەڭگە ارالىعىندا. ءبىر ايدا تەك كوفە ءۇشىن كەمىندە 30 000 تەڭگە شىعىنداناسىز. ورازا ۋاقىتىندا كوفەنى ۇيدە دايىنداپ، ايىنا ورتا ەسەپپەن 5000 تەڭگەدەن اسىرماي-اق تۇتىنۋعا بولادى. سوندا تاعى 25 000 تەڭگە ۇنەمدەلەدى.
جوعارىدا كەلتىرىلگەن ەسەپتى بىرىكتىرسەك، تەك ءبىر ايدا عانا 170 000 تەڭگەگە جۋىق اقشا ۇنەمدەۋگە بولاتىنى انىقتالىپ وتىر. ال ەندى بۇل ۇنەمدەلگەن اقشانى قارجىلىق ماقساتتارىڭىزعا باعىتتاپ، ونى ءارى قاراي ينۆەستيسياعا نەمەسە دەپوزيتكە سالساڭىز، قارجىلىق جاعدايىڭىزدى بىرتىندەپ جاقسارتۋعا ناقتى قادام جاسايسىز. ەگەر بۇل سومانى اي سايىنعى دەپوزيتكە سالىپ وتىرساڭىز، جىل سوڭىنا قاراي 2 ميلليون تەڭگەگە جۋىق جيناق پايدا بولادى.
پسيحولوگيالىق تۇرعىدان العاندا دا، ورازا كەزىندە ادامنىڭ قارجىعا دەگەن كوزقاراسى وزگەرەدى. بۇل كەزەڭدە قاجەت پەن قاجەتسىزدى اجىراتىپ، اقشانى باسقارۋ داعدىلارىڭىز كۇشەيەدى. ادامنىڭ ءوز-وزىن باسقارۋ قابىلەتى ارتقاندا، اقشاعا دەگەن قۇرمەتى مەن جاۋاپكەرشىلىگى دە ارتادى. بۇرىن ءمان بەرمەگەن ۇساق شىعىندارعا مۇقيات بولاسىز، قارجىنى ماقساتسىز شاشۋدان تىيىلاسىز. ياعني، ورازا ۇستاپ وتىرىپ، ادامنىڭ قارجىلىق ادەتتەرى رەتتەلىپ، اقشا جۇمساۋداعى ۇقىپتىلىعى قالىپتاسادى.
وسىلايشا، ورازا تەك رۋحاني جاعىنان ەمەس، قارجىلىق جاعىنان دا بايىپ، اقشانى سانالى باسقارۋعا كومەكتەسەتىن بىرەگەي كەزەڭ. بۇل ۋاقىتتى ءتيىمدى پايدالانىپ، قارجىلىق ساۋاتىڭىزدى ارتتىرۋعا، ومىرىڭىزگە اقشانىڭ وڭاي كەلۋىنە جاعداي جاساۋعا ابدەن بولادى. سوندىقتان، ورازا ۇستاپ، رۋحاني عانا ەمەس، ماتەريالدىق جاعىنان دا بايىپ كەتۋ ابدەن مۇمكىن!
