سالاداعى ماسەلەلەر جان-جاقتى تالقىلاناتىن جىل سايىنعى ءداستۇرلى شاراعا ق ر ءبىلىم جانە عىلىم مينيسترلىگىنىڭ وكىلى، وبلىستىق ءماسليحات دەپۋتاتتارى مەن باسقارما باسشىلارى، اۋدان، قالا اكىمدەرى، جالپى ءبىلىم سالاسىنا قاتىستى قۇرىلىمداردىڭ جەتەكشىلەرى سىندى 800-دەن استام ادام قاتىستى.
ەڭ الدىمەن، كونفەرەنسيادا وبلىستىق ءبىلىم باسقارماسىنىڭ باسشىسى يساتاي ساعىندىقوۆ ءبىلىم سالاسىنداعى جەتىستىكتەر مەن الدا اتقارىلاتىن جۇمىستار جايىن باياندادى.
اتاپ ايتقاندا، بيىل ءبىلىم سالاسىن قارجىلاندىرۋعا وبلىستىق بيۋدجەتتەن 257،6 ملرد. تەڭگە ءبولىنىپ، وتكەن جىلمەن سالىستىرعاندا 19 ملرد. تەڭگەگە ارتىپ وتىر. مۇنان بولەك، وسى جىلى 31،2 ملرد. تەڭگەگە 79 ءبىلىم نىسانىنىڭ قۇرىلىسى جۇرگىزىلىپ جاتسا، ونىڭ 29 ءبىلىم نىسانى جىل سوڭىنا اياقتالىپ، پايدالانۋعا بەرىلەدى.
2016 جىلى اپاتتى جانە ءۇش اۋىسىمدى 43 مەكتەپ بولعان ەدى. اعىمداعى جىلى 20 مەكتەپتىڭ قۇرىلىسى تاپسىرىلادى، ال قالعان 23 مەكتەپتىڭ قۇرىلىسىن 2018-2019 جىلدارى اياقتاۋ جوسپارى ىسكە اسا باستادى. مەكتەپكە دەيىنگى تاربيە مەن وقىتۋ ۇيىمدارى وتكەن وقۋ جىلىمەن سالىستىرعاندا 95 بىرلىككە (جەكەمەنشىك – 93 بالاباقشا، 3 شاعىن ورتالىق) ارتىپ، بالا باقشاعا كەزەككە تۇرعان 3-6 جاستاعى بالالار سانى 43 مىڭنان 28 مىڭعا ازايدى.
مەملەكەتتىك باعدارلاماعا سايكەس مەكتەپ وقۋشىلارى تەگىن وقۋلىقتارمەن قامتاماسىز ەتىلۋدە. وبلىس بويىنشا وسى وقۋلىقتارعا جالپى 4،5 ملرد. تەڭگە ءبولىنىپ، وتكەن جىلمەن سالىستىرعاندا 1،8 ملرد. تەڭگەگە ءوستى.
جيىن بارىسىندا ءسوز العان وبلىس باسشىسى ءوڭىر پەداگوگتارىن جاڭا وقۋ جىلىمەن قۇتتىقتاپ، ەلباسىنىڭ رۋحاني جاڭعىرۋ باعدارلاماسىندا ايتىلعان ءبىلىم سالاسىنا قاتىستى جۇكتەگەن مىندەتتەرگە توقتالدى.
«بۇگىنگى تامىز كەڭەسى – ءبىلىم بەرۋ ىسىندەگى جەڭىستەرىمىز بەن كەمشىلىكتەردى سارالايتىن ايشىقتى الاڭ جانە الدىمىزدا تۇرعان مىندەتتەردى پىسىقتايتىن ماڭىزدى باسقوسۋ. ەلباسى نۇرسۇلتان ءابىش ۇلى نازاربايەۆ «تابىستى بولۋدىڭ ەڭ ىرگەلى، باستى فاكتورى ءبىلىم ەكەنىن اركىم تەرەڭ ءتۇسىنۋى كەرەك. جاستارىمىز باسىمدىق بەرەتىن مەجەلەردىڭ قاتار¬ىندا ءبىلىم ءاردايىم ءبىرىنشى ورىندا تۇرۋى شارت. سەبەبى، قۇندىلىقتار جۇيەسىندە ءبىلىمدى بارىنەن بيىك قوياتىن ۇلت قانا تابىسقا جەتەدى.» - دەگەن بولاتىن. سوندىقتان دا بۇگىنگى تاڭ – ءبىلىم بەرۋ مازمۇنىنا، وقۋشى مەن پەداگوگ تۇلعاسىنا جانە قىزمەتىنە دەگەن كوزقاراستار تۇبەگەيلى وزگەرىسكە بەت بۇرىپ وتىرعان كۇردەلى كەزەڭ»، - دەدى ج.تۇيمەبايەۆ.
ءبىلىم بەرۋ سالاسىنداعى جەتىستىكتەردى سارالاپ بولعان سوڭ، ايماق اكىمى سالاداعى كەمشىن ءتۇسىپ جۇرگەن ماسەلەلەرگە دە توقتالدى. ساپالى ءبىلىم بەرۋ جايتتارى مەن سۋيسيد، سىبايلاس جەمقورلىق سالاسىنداعى وزەكتى ماسەلەلەردى شەشۋدىڭ ءبىرقاتار جولدارىن نۇسقاعان جانسەيىت قانسەيىت ۇلى اتالعان پروبلەمالاردى شەشۋدە ءوڭىر تۇرعىندارىنىڭ دا بەلسەندى بولۋى قاجەتتىگىن جەتكىزدى.
تامىز كونفەرەنسياسىندا ءبىلىم سالاسىندا تالاي جىلداردان بەرى ۇلگىلى قىزمەت ەتىپ كەلە جاتقان وڭىردەگى ءۇش ۇستازعا – اتاپ ايتقاندا، شىمكەنت قالاسى، №39 م.جۇمابايەۆ اتىنداعى جالپى ورتا مەكتەبىنىڭ باستاۋىش سىنىپ ءمۇعالىمى اينۇر دۇيسەبەكوۆاعا، شىمكەنت قالاسى، №66 قازىعۇرت جالپى ورتا مەكتەبىنىڭ ينفورماتيكا ءپانىنىڭ ءمۇعالىمى جانات مۇسايەۆاعا جانە تۇركىستان قالاسى، №9 نەكراسوۆ اتىنداعى گيمنازياسىنىڭ قازاق ءتىلى ءپانى ءمۇعالىمى ۆەنەرا باتىرقۇلوۆاعا پاتەر كىلتى تابىستالدى. سونىمەن قاتار، جيىندا وبلىس اكىمىنىڭ گراموتاسىنا 5 پاداگوگ يە بولسا، 8 ۇستاز وبلىس باسشىسىنىڭ العىس حاتىن الدى. قازاقستان رەسپۋبليكاسى ءبىلىم جانە عىلىم مينيسترلىگىنىڭ ناگرادالارى اياسىندا 5 ءمۇعالىم «ى.التىنسارين» توسبەلگىسىن، 5 ۇستاز «ءبىلىم بەرۋ ءىسىنىڭ قۇرمەتتى قىزمەتكەرى» توسبەلگىسىن، 4 سالا قىزمەتكەرلى «قۇرمەت گراموتاسىن» جانە 4 مۇعالىمگە «العىس حاتى» بۇيىردى.
ايتا كەتۋ كەرەك، وڭىردە قازىرگى تاڭدا 69 مىڭنان اسا ءمۇعالىم ءبىلىم بەرەدى. 2017-2018 جاڭا وقۋ جىلىنا 640 مىڭعا جۋىق وقۋشى كەلەدى، ياعني وتكەن جىلمەن سالىستىرعاندا 28 مىڭعا (2016ج.-611318) وسەدى دەگەن ءسوز. ونىڭ ىشىندە، 1-سىنىپقا باراتىن بالالار سانى 73691 بالانى قۇراپ وتىر. جالپى ءوڭىر بويىنشا 1036 مەكتەپ بار، ونىڭ ىشىندە 7-ەۋى جەكە مەنشىك.
وقو اكىمىنىڭ باسپا ءسوز قىزمەتى
