وڭتۇستىك قازاقستاندا جىل سوڭىنا دەيىن وبلىستىق ماڭىزى بار التى اۆتوموبيل جولى قايتا قۇرۋ جانە كۇردەلى جوندەۋ جۇمىستارىنان وتەدى. ءتيىستى جۇمىستاردى باستاۋعا تاياۋدا وبلىستىق ءماسليحاتتىڭ كەزەكتى سەسسياسىندا دەپۋتاتتاردىڭ قولداۋىمەن قوماقتى قارجى ءبولىندى.

اتاپ ايتقاندا، وسى جىلدىڭ ەكىنشى جارتى جىلدىعىندا سايرام اۋدانىنىڭ ورتالىعى اقسۋكەنت پەن شىمكەنت قالاسىن قوساتىن كۇرە تامىر جول - وبلىستىق ماڭىزى بار كح-97 «اقسۋ-قابىلساي-قالا قوقىس ورنى» اۆتوموبيل جولىنىڭ 10-18 شاقىرىمى قايتا قۇرۋ جۇمىستارىنان وتەدى. جوباعا سايكەس، قولدانىستاعى جولدىڭ (7-9 م) ەنى 14 مەترگە كەڭەيتىلىپ، ەكى شەتىنەن سۋاعار، جارىق شامدارى جانە اياقجولدار سالىناتىن بولادى.  جولدىڭ 14 شاقىمىنداعى («ەلنۇر» تويحاناسىنىڭ ماڭى) جەر ءۇستى تەمىر جول وتپەسىنىڭ جانىنان ەكىنشى وتپە قۇرىلىسى جۇرگىزىلەدى. مۇنداي قايتا قۇرۋ جۇمىستارى سايرام تۇرعىن الابى مەن شىمكەنت قالاسىن قوساتىن وبلىستىق ماڭىزى بار كح-83 «شىمكەنت-سايرام-قارامۇرت» اۆتوموبيل جولىنىڭ 0-8 شاقىرىمىندا دا جۇرگىزىلەدى. وندا دا قولدانىستاعى جولدىڭ (7 م) ەنى 14 مەترگە كەڭەيتىلىپ، ەكى شەتىنەن سۋاعار، جارىق شامدارى جانە اياقجولدار سالىناتىن بولادى.

بولىنگەن قارجىعا ءبىرقاتار كوشەلەرگە كۇردەلى جوندەۋ جۇمىستارى جۇرگىزىلمەك. ماسەلەن، سايرام اۋدانىنداعى كح-82 «شىمكەنت-لەنگىر-دوستىق-قاسقاسۋ-كوكسايەك-سايرام» اۆتوموبيل جولىنىڭ 83،8-103،3 شاقىرىمى مەن اتالعان اۋدانداعى كح-83 «شىمكەنت-سايرام-قارامۇرت» اۆتوموبيل جولىنىڭ 8-26،1 شاقىرىمى كۇردەلى جوندەۋ جۇمىستارىنان وتەدى. سونىمەن قاتار، وسى سىندى شارۋالار تولەبي اۋدانىنداعى كح-3 «كوكسايەك-اقسۋ-شايان-مىڭبۇلاق-م32 ر/ج» اۆتوموبيل جولىنىڭ 0-3 شاقىرىمى مەن قازىعۇرت اۋدانىنداعى كح-85 «ا-2 ر/ج-اكتاس-رابات-ا-2 ر/ج» اۆتوموبيل جولىنىڭ 0-30 شاقىرىمدارىندا جاسالادى دەپ كۇتىلۋدە. ايتا كەتۋ قاجەت، قازىعۇرتتاعى اتالعان جول «باتىس ەۋروپا-باتىس جۇڭگو» حالىقارالىق كولىك ءدالىزىنىڭ «شىمكەنت-تاشكەنت» باعىتىنىڭ 1 ۋچاسكەسىن سالۋ كەزىندە اينالما جول قىزمەتىن اتقارىپ، جولدىڭ جاعدايى جارامسىز كۇيگە جەتكەن-دى. جوباعا سايكەس قولدانىستاعى جولعا كۇردەلى جوندەۋ جۇمىستارى جۇرگىزىلىپ، ەلدى مەكەن اۋماعىندا اياجولدار مەن جارىق شامدارى سالىناتىن بولادى.

 

وقو اكىمىنىڭ باسپا ءسوز قىزمەتى