ەكى جىل بۇرىن باقتيار ايتپايەۆ جۇمىسىنان ايرىلادى، سودان كەيىن استانالىق جۇمىسپەن قامتۋ ورتالىعىنا ەسەپكە تۇرۋ ءۇشىن جۇگىنەدى. ءبىراق ول جۇمىسسىز مارتەبەسىندە ۇزاق ۋاقىت بولعان جوق.
– جاستار جۇمىسپەن قامتۋ ورتالىعىنا جۇگىنۋدى ۇيات دەپ سانايدى. دەگەنمەن، كوپتەگەن ادامدار بىزگە حابارلاسىپ، جۇمىسقا ورنالاستى. مەن وزىمە مىسال كەلتىرە الامىن. 2019 جىلى مەن جۇمىسىمنان ايىرىلدىم. سودان كەيىن مەن ەسەپكە تۇرۋ جانە جۇمىسىنان ايرىلۋعا بايلانىستى جاردەماقى الۋ ءۇشىن جۇمىسپەن قامتۋ ورتالىعىنا باردىم. ماعان جۇمىسپەن قامتۋ باسقارماسىنىڭ «قوعامدىق جۇمىستار» باعدارلاماسىنا قاتىسۋعا ۇسىنىس جاسادى. مەن ول جەردە تامىز ايىنان قاراشاعا دەيىن جۇمىس ىستەدىم. وسىدان كەيىن ماعان مەملەكەتتىك قىزمەتكە تەستىلەۋدەن ءوتۋ ۇسىنىلدى، – دەپ ەسكە الدى ول.
باقتيار ايتپايەۆ تەستىلەۋدەن جانە اڭگىمەلەسۋدەن ءساتتى وتەدى، سودان كەيىن ول قالانىڭ جۇمىسپەن قامتۋ جانە الەۋمەتتىك قورعاۋ باسقارماسىنىڭ زاڭ ءبولىمىنىڭ باس مامانى بولدى.
– مەن وتە قاتتى تىرىستىم جانە مەنىڭ ەڭبەگىم ەش كەتكەن جوق. 2021 جىلدىڭ ناۋرىز ايىندا ماعان جۇمىسپەن قامتۋ ورتالىعى ديرەكتورىنىڭ ورىنباسارى قىزمەتىن ۇسىندى. ءبىزدىڭ ديرەكتور ازامات بايتاسوۆ تا 2012 جىلى وسى ورتالىققا جۇگىنىپ، مانساپ ساتىسىنىڭ بارلىق كەزەڭىنەن ءوتتى. «استانا جاستارى» كمم باسشىسى ايان ەرمەنتايەۆ جۇمىسپەن قامتۋ ورتالىعى ارقىلى ەڭبەك كوميتەتىنە جىبەرىلدى. جانە كەلتىرەر بولساق مۇنداي مىسالدار كوپ. ەگەر ادام مەملەكەتتىك قىزمەتكە باعدارلاما بويىنشا باراتىن بولسا، ونىڭ مۇمكىندىگى بار - وعان مانساپ ونىڭ ەڭبەك كورسەتكىشتەرىنەن كەلەدى، – دەپ ەسەپتەيدى جۇمىسپەن قامتۋ ورتالىعى ديرەكتورىنىڭ ورىنباسارى.
ەلوردالىق جۇمىسپەن قامتۋ ورتالىعىنا جۇگىنۋ ءۇشىن نۇر-سۇلتاندا تىركەلۋ قاجەت. جاستار «جاستار پراكتيكاسى»، «ءبىرىنشى جۇمىس ورنى»، «ۇرپاقتار كەلىسىمشارتى» سياقتى جۇمىسقا ورنالاستىرۋ باعدارلامالارىنا قاتىسا الادى. سونداي-اق بيزنەس-يدەيالاردى ىسكە اسىرۋ ءۇشىن گرانتتار بەرىلەدى. جىل باسىنان بەرى 167 ادام گرانتقا يە بولدى.
– جوعارى وقۋ ورىندارىندا وقىپ جۇرگەن كەزدە جاستاردىڭ كوبىندە امبيسيا مەن جوعارى تالاپتارى بولادى. وقۋدى بىتىرگەننەن كەيىن ولار جۇمىس ورنىن وزدەرى تابۋعا تىرىسادى. ءبىراق كوپشىلىگى جۇمىسقا تۇرا المايدى جانە ولار بىزگە كەلەدى. بىزدە جۇمىس تاجىريبەسى جوق ادامدارعا ارنالعان باعدارلامالار وتە كوپ، – دەدى باقتيار ايتپايەۆ.
جىل باسىنان بەرى جۇمىسپەن قامتۋ ورتالىعىنا 16 000-نان استام ادام جۇگىندى، ونىڭ ىشىندە 6 000-نان استامى تۇراقتى جۇمىس ورنىنا ورنالاستىرىلدى؛ «جاستار پراكتيكاسى» باعدارلاماسى بويىنشا – 881؛ قوعامدىق جۇمىستارعا جىبەرىلگەندەر – 2 718؛ «ءبىرىنشى جۇمىس ورنى» باعدارلاماسى بويىنشا – 71؛ الەۋمەتتىك جۇمىس ورىندارىنا ورنالاستىرىلعاندار-180.
– بىزدە ۋاقىتشا جۇمىسپەن قامتۋ ءبولىمى بار. بۇل ءبولىمنىڭ قىزمەتكەرلەرى ستۋدەنتتەر ءىسى جونىندەگى كوميتەتتەرمەن، كوللەدجدەردىڭ، جوعارى وقۋ ورىندارىنىڭ مانساپتىق ءوسۋ بولىمدەرىمەن جۇمىس ىستەيدى. پاندەمياعا بايلانىستى ءبولىم قىزمەتكەرلەرى ەكىنشى جىل وقۋ ورىندارىنا بارمايدى. بۇعان دەيىن ولار تۇلەكتەرمەن كەزدەسىپ، ولارعا العاشقى تاجىريبە الۋ ءۇشىن قانداي باعدارلامالار بار ەكەندىگى تۋرالى ايتىپ بەردى. ءقازىر بۇل كەزدەسۋلەر ونلاين وتكىزىلەدى.
جۇمىسپەن قامتۋ ورتالىعى ديرەكتورى ورىنباسارىنىڭ ايتۋىنشا، جۇمىس تاجىريبەسى جوق جاس ماماندار "ءبىرىنشى جۇمىس ورنى" باعدارلاماسىن پايدالانا الادى. سونىمەن قاتار، جۇمىسپەن قامتۋ ورتالىعى ۇنەمى بوس ورىندار جارمەڭكەسىن وتكىزەدى. ايتا كەتەيىك، قالادا بوس جۇمىس ورىندارى از ەمەس، جۇمىس بارلىعىنا جەتەدى، دەپ سەندىردى باقتيار ايتپايەۆ.
