نوعايەۆ: «قوعامدى ۇلتسىزدانۋدان قورعاۋىمىز كەرەك»

Dalanews 12 جەلت. 2016 15:52 483

اتىراۋ وبلىسىنىڭ اكىمى نۇرلان نوعايەۆ قازاق قوعامىن ۇلتسىزدانۋدان قورعاۋىمىز كەرەك دەپ مالىمدەدى. ايماق باسشىسى بۇل تۋرالى وبلىستا وتكەن رەسپۋبليكالىق جۇمەكەن ناجىمەدەنوۆ وقۋلارى كەزىندە ايتتى.

– ارامىزدا ءداستۇرىن، مادەنيەتىن ۇمىتىپ بارا جاتقان ازاماتتار بار. ءبىز ۇل-قىزدارىمىزدى ۇلتسىزدانۋدان قورعاۋىمىز كەرەك. ال، بۇل پروسەسكە توتەپ بەرەتىن بىردەن-بىر نارسە – رۋحتىڭ بيىكتىگى. جاستار رۋحقا ازىق بولاتىن حالقىنىڭ مۇرالارىنان ۇنەمى ءنار الىپ وتىرۋى قاجەت، – دەدى نۇرلان نوعايەۆ.

ايتا كەتەلىك، جۇمەكەن ناجىمەدەنوۆ اتىنداعى رەسپۋبليكالالىق كوركەم ءسوز وقۋ شەبەرلەرى سايىسى وبلىستا بيىل ءبىرىنشى رەت وتكىزىلىپ وتىر.

بايقاۋ قورىتىندىسى بويىنشا، اتىراۋلىق ۇمىتكەر ءنازيرا ءاشىم ءبىرىنشى ورىندى ەنشىلەسە، اقمولا وبلىسىنان كەلگەن پەريزات مۇرات قىزى مەن ماڭعىستاۋلىق ايدوس جۇمابايەۆ جۇلدەلى ەكىنشى ورىندى جەڭىپ الدى. ال، اتىراۋلىق نۇرداۋلەت تابىلدييەۆ، شىعىس قازاقستاننان كەلگەن ارايلى التايەۆا، وڭتۇستىك قازاقستاننان قاتىسقان نازەركە قۇلجابايەۆا ءوزارا ءۇشىنشى ورىندى ءبولىستى.

تالاپاكەرلەرگە ق ر مەملەكەتتىك سىيلىعىنىڭ يەگەرى، جازۋشى قاجىعالي مۇحانبەتقالي ۇلى، حالىقارالىق «الاش» ادەبي سىيلىعىنىڭ يەگەرى، اقىن سەرىك تۇرعىنبەك ۇلى، ق ر پرەزيدەنتى سىيلىعىنىڭ لاۋرەاتى، جازۋشى مەرەكە قۇلكەنوۆ، فيلولوگيا عىلىمدارىنىڭ دوكتورى، اقىن ءقادىر ءجۇسىپ جانە اتىراۋ وبلىستىق مادەنيەت، مۇراعاتتار جانە قۇجاتتاما باسقارماسىنىڭ باسشىسى ءابىل جولامانوۆ قازىلىق ەتتى.

جۇمەكەن ناجىمەدەنوۆ – قازاقستان رەسپۋبليكاسى مەملەكەتتىك ءانۇرانى ءماتىنىنىڭ اۆتورى، كورنەكتى اقىن، قازاقستان جاستار وداعى سىيلىعىنىڭ يەگەرى.

 

دەرەككوزى: tilshi.kz

ۇسىنىلعان
سوڭعى جاڭالىقتار