ەكس-پرەزيدەنت نۇرسۇلتان نازاربايەۆتىڭ جيەنى ءنۇرالى الييەۆ ۇلىبريتانيالىق ءانشى ەد شيراننىڭ كونسەرتىندە توبە كورسەتىپ، كوپشىلىكتىڭ نازارىنا ىلىكتى، - دەپ حابارلايدى Dalanews.kz.
ساياحات بارىسىنداعى اسەرلەرىن الييەۆ الەۋمەتتىك جەلىدە جاريالادى. بەلگىلى بولعانداي، الەمدىك جۇلدىزدىڭ ءان كەشى وڭتۇستىك ازياداعى بۋتان كورولدىگىندە وتكەن.
ءنۇرالى الييەۆ كونسەرتتەن بولەك، بۋتان كورولىمەن تۇسكەن سۋرەتىن دە ءبولىسىپ، تحيمپحۋ قالاسىندا تۇسىرىلگەن فوتولارىن جاريالاعان. سۋرەتتەردىڭ بىرىندە امانكورا ءقوناقۇيى كورىنىس تاپقان. اشىق دەرەككوزدەرگە سۇيەنسەك، بۇل ءقوناقۇي تاۋ باۋرايىنداعى ەڭ بەدەلدى اۋداندا، كورول رەزيدەنسياسىنىڭ جانىندا ورنالاسقان.
الەۋمەتتىك جەلىدەن
جەلىگە جۇكتەلگەن فوتولاردا ءنۇرالىنىڭ جانىندا نەپالدىق كاسىپكەر نيرۆانا ءچاۋدحاريدىڭ جۇرگەنىن بايقاۋعا بولادى.
الەۋمەتتىك جەلىدەن
وسى ساپار تۋرالى وي ءبولىسىپ جاتقان ساراپشىلاردىڭ پىكىرىنشە، نازاربايەۆ اۋلەتىنىڭ وكىلى ەمىن-ەركىن ەل ارالاپ ءجۇر. ءبىرقاتار تەلەگرام ارنالاردىڭ پايىمداۋىنشا، الييەۆ ەلگە ورالۋعا اسىقپايدى.
بۇعان دەيىن تانىمال بريتان ءجۋرناليسى جواننا ليلليس “قارا كولەڭكە” دەيتىن ەڭبەگىندە قاندى قاڭتارعا دەيىن "ءنۇرالى اتاسى مەن اناسىنىڭ قالقاسىنان (وپەكاسىنان) شىعىپ، اۋلەتتىڭ ساياسي دوميناسياسىن ۇزارتۋ ميسسياسىن ءوز موينىنا الۋعا ءتاس-تۇيىن دايىن وتىرعانىن" جازعان بولاتىن.
كنب-نىڭ ەكس-توراعاسى امانگەلدى شابداربايەۆ تا وسى مالىمەتتى راستاپ، "داريعا بيلىكتى باسىپ الۋدى كوزدەدى" دەگەن پىكىر بىلدىرگەن.
Dalainside تەلەگرام ارناسىنا بەلگىلى بولعانداي، “شەتەل اسقان اكتيۆتى قايتارۋ تۋرالى” زاڭ كۇشىنە ەنگەلى الييەۆتىڭ PR قىزمەتى مەن شەتەل لوببيستەرى ءنۇرالىنىڭ ۇنامدى بەينەسىن قالىپتاستىرۋعا شۇعىل كىرىسكەن.
ماسەلەن بىلتىر: “نازاربايەۆتىڭ نەمەرەسى جابايى تابيعاتتىڭ جاناشىرى. قار بارىسىنىڭ قامقورشىسى، ءتۇز تاعىسىن ساقتاپ قالۋعا ولشەۋسىز ۇلەس قوسقان ادام...” دەگەن باعىتتى كونتەنت كۇرت كوبەيگەن ەدى.
بىزدىڭشە، مۇنىڭ استارىندا ساياسي جانە قارجىلىق ستراتەگيا جاتىر. ءالتۋريستىڭ وبرازىن سومدايتىن ءنۇرالى وسى ارقىلى شەتەلدەگى اكتيۆىن زاڭداستىرا الادى ءارى سالىقتىق جەڭىلدىكتەرگە يە بولادى.
الييەۆتىڭ قازىرگى تۇرعىلىقتى مەكەنى اراب امىرلىكتەرى دەپ تۇسپالدايمىز. استانا اكىمىنىڭ ورىنباسارى بولعان تۇستا (2014-2016 ج) ءنۇرالى شەتەلدىك ينۆەستيسياعا جاۋاپ بەرگەن. سول جىلدارى ابۋ-دابيدىڭ شەيحى ال-ناقايانمەن ءجيى جۇزدەسكەن الييەۆ ءوزىنىڭ Capital Holding كومپانياسى ارقىلى ەميراتتاعى جىلجىمايتىن مۇلىككە ينۆەستيسيانى ۇيىپ-توكتى دەۋگە نەگىز بار. Capital Holding بەرتىنگە دەيىن داڭقتى بوكسشى گەنناديي گولوۆكينگە دەمەۋشى بولعانىن بىلەمىز.
