قىرعىزستانمەن شەكاراداعى ماسەلەنى شەشۋ ءۇشىن پرەزيدەنتتەر دەڭگەيىندە كەلىسسوز جۇرگىزۋ كەرەك. وسىلاي دەپ قىرعىزستاننىڭ ەكس-پرەزيدەنتى روزا وتىنبايەۆا مالىمدەدى.
«ەڭ باستىسى پرەزيدەنت تاراپىنان ءبىرىنشى قادام جاسالۋى ءتيىس. پرەزيدەنت ءوزىنىڭ جاۋاپكەرشىلىگىن سەزىنەدى مە، بىلەدى مە؟ تىپتەن كەشىرىم سۇراماعان كۇننىڭ وزىندە، قازاقستان پرەزيدەنتىنىڭ بابىن تابۋ كەرەك»، - دەدى وتىنبايەۆا ەكى ەل شەكاراسىندا بولىپ جاتقان جاعدايعا قاتىستى.
وتىنبايەۆا بۇل ماسەلە ۇكىمەت دەڭگەيىندە شەشىلمەيدى دەپ ەسەپتەيدى.
قازاقستانمەن شەكارا ماسەلەسى 10 قازاندا قيىنداي تۇسكەن. قىرعىزستاننىڭ شەكارا قىزمەتىنىڭ مالىمەتىنە قاراعاندا، قازاقستان شەكارا وتكىزۋ بەكەتىن كۇشەيتكەن.
7 قازاندا پرەزيدەنت المازبەك اتامبايەۆ قازاقستان پرەزيدەنتى ەلدىڭ ىشكى ىسىنە ارالاسىپ وتىر دەدى. ول سونىمەن بىرگە نازاربايەۆتى پرەزيدەنتتىكتەن ۇمىتكەر ومىربەك بابانوۆپەن كەزدەسىپ، قولداۋ ءبىلدىردى دەپ، قازاقستاندىق بيزنەسمەن بولات وتەمۇراتوۆ بولسا، ەكىنشى كانديدات تەمير سارييەۆتى قولداپ وتىر دەپ سىنعا الدى.
