گەرمانيادا دارىگەرلەر رەسەيلىك وپپوزيسيونەر الەكسەي ناۆالنىيدىڭ اعزاسىنان «نوۆيچوك» توبىنا كىرەتىن حيميالىق ۋلى زاتتىڭ ىزدەرى تاپقان. بۇل تۋرالى گەرمانيا ۇكىمەتىنىڭ وكىلدەرى حابارلادى.

حيميالىق قارۋدى جويۋ بويىنشا ۇيىم، ەۋرووداق جانە ناتو ۋ تۋرالى حاباردار. گەرمانيا سىرتقى ىستەر مينيسترلىگى ناۆالنىيدىڭ ساراپتاما قورىتىندىلارىن حابارلاۋ ءۇشىن رەسەي ەلشىسىن شاقىردى.

گەرمانيا بيلىگى ناۆالنىيدىڭ ۋلانعانىن «قاتاڭ سىناپ»، رەسەي بيلىگىنەن جاعدايدى ءتۇسىندىرۋدى تالاپ ەتتى.

رەسەي پرەزيدەنتى ۆلاديمير ءپۋتيننىڭ سىنشىسى ناۆالنىي 20 تامىزدا «ۋلانعان بولۋى مۇمكىن» دەپ ومبى اۋرۋحاناسىنا تۇسكەن بولاتىن.

ەرتەسىندە گەرمانيا ناۆالنىيدى بەرليندەگى اۋرۋحاناعا اكەتۋ ءۇشىن ارنايى ساناۆياسيا جىبەردى. و باستا ومبى دارىگەرلەرى ناۆالنىيدى ورنىنان قوزعاۋعا بولمايدى دەپ ونى گەرمانياعا جىبەرۋدەن باس تارتقان. كەيىن ولار ناۆالنىيدى اۋرۋحانادان اكەتۋگە رۇقسات بەرىپ، ناۆالنىي 22 تامىزدا بەرلينگە جەتكىزىلگەن.

رەسەيلىك دارىگەرلەر ناۆالنىيدىڭ العاشقى ساراپتاماسىنان ۋلى زات تابىلماعانىن حابارلاعان ەدى. ءبىراق ونىڭ جاقتاستارى ساياساتكەردىڭ ۋلانعانىن ايتقان.

24 تامىزدا بەرليندەگى Charite كلينيكاسى «ناۆالنىي ينگيبيتور حولينەستەراز توبىنا جاتاتىن ۋلى زاتتان ۋلانعان» دەپ مالىمدەگەن.

گەرمانيا سىرتقى ىستەر ءمينيسترى گەيكو مااس «ەگەر ناۆالنىيدىڭ ۋلانۋىنا رەسەي بيلىگىنىڭ قاتىسى بارى دالەلدەنسە، ماسكەۋگە ديپلوماتيالىق سانكسيا سالىناتىنىن» ايتتى.

2018 جىلى ناۋرىزدا 2018 جىلعى ناۋرىزدا ۇلىبريتانيانىڭ سولسبەري قالاسىندا رەسەي اسكەري بارلاۋىنىڭ (گرۋ) بۇرىنعى وفيسەرى سەرگەي سكريپال مەن ونىڭ قىزى يۋليا سوۆەتتىك "نوۆيچوك" ۋىنان ۋلانىپ قالعان. ولاردى ەس-تۇسسىز كۇيدە اۋرۋحاناعا جەتكىزگەن. ەكەۋى ۇزاق ۋاقىت ەمدەلىپ امان قالعان. سەرگەي سكريپال ءقازىر جاڭا زەلانديادا تۇرىپ جاتىر. لوندون ولارعا قاستاندىقتى كرەمل ۇيىمداستىرعان دەپ مالىمدەپ، رەسەي پرەزيدەنتى ۆلاديمير ءپۋتيندى ايىپتاعان.