مەن ەستۋىمشە، ساپارحان وماروۆ مىرزا، اۋىل شارۋاشىلىعى ءمينيسترى، پرەزيدەنت جاريالاعان جەر كوميسسياسىنىڭ قۇرامىنا مەنى كىرگىزگىسى كەلمەي جاتىر. ول تۇسىنىكتى، مەنىڭ كوزقاراسىم ءمينيستردىڭ كوزقاراسىنا قاراما قايشى عوي، دەپ ءبىر شىندىقتىڭ بەتىن اشتى مۇحتار تايجان.

ءبىراق جەر ماسەلەسى تەك ءسىزدىڭ جەكە ماسەلەڭىز ەمەس، نەمەسە تەك اتامەكەن ۇيىمىنىڭ، نەمەسە تەك فەرمەرلەردىڭ ەمەس - جەر دەگەن جالپىۇلتتىق ماسەلە. مەن ءسىزدىڭ جەكە وتباسىلىق تويىڭىزعا بارايىن دەپ تۇرعان جوقپىن. جەر ماسەلەسىمەن مىنە 5 جىل اينالىسىپ كەلە جاتىرمىن. 2016 جىلى ءساۋىر ايىندا سول جەر ميتينگىسىن ۇيىمداستىرعانىم ءۇشىن مەنى پوليسيا 2 رەت ءۇيىمنان الىپ كەتەتىن جايتتار بولدى.

سوندىقتان سول كوميسسياعا كىرۋ، جەر ماسەلەسىن تۇبىگەيلى اياعىنا دەيىن جەتكىزۋ - ول مەنىڭ مورالدىك قۇقىعىم، ال حالىقتىڭ الدىندا - پارىزىم، دەيدى تايجان.

ماعان كەدەرگى جاساماڭىز، نەمەسە وزىڭىزگە اۋىر تيەدى. ادىلەتسىز سايلاۋ، سىبايلاس جەمقورلىق - بۇل ماسەلەلەر ۋاقىتشا عانا. ال جەرسىز مەملەكەتىمىز قۇريدى، ىدىراپ كەتەدى. كەيبىرەۋلەردىڭ ارمانى - جەردى مەنشىككە ساتۋ - ءتۇبى سوعان اپارادى. ال ءبىز وعان جول بەرمەيمىز. كوميسسيا ارقىلى بولماسا، جەر ماسەلەسىن ءبىز باسقاشا شەشۋگە كىرىسەمىز. قالاي بولسا دا، حالىقتىڭ تالابىن ورىندالۋىن قامتاماسىز ەتەمىز. سوندىقتان ماسەلەنى ۇلكەن قاقتىعىسقا اپارماي ۇستەلدىڭ باسىندا شەشكەنىمىز ءجون، - دەپ جازدى ول.