4 قازاقستاندىق ميانمادا قۇلدىققا تۇسكەن،- دەپ حابارلايدى Dalanews.kz Dunyo باسىلىمىنا سىلتەپ.
ميانمادا ادام ساۋداسىنىڭ قۇربانى بولعان وزبەكستان، قازاقستان جانە قىرعىزستان ازاماتتارى ديپلوماتتاردىڭ كومەگىمەن وتانىنا قايتارىلعان.
وسىنداي جاعدايعا تاپ بولعاندار اراسىندا قىرعىزستاننىڭ 8 ازاماتى جانە قازاقستاننىڭ 4 ازاماتى بولعان.
"ميانما مەن تايلاندتىڭ قۇزىرەتتى ورگاندارىمەن كەلىسىلگەن ءىس-قيمىلدار مەن كەلىسسوزدەر ناتيجەسىندە وزبەكستان، قازاقستان جانە قىرعىزستان ازاماتتارى بوساتىلىپ، ۋاقىتشا باسپانا جانە تاماقپەن قامتاماسىز ەتىلىپ، ماەسوت (تايلاند) شەكارالىق پۋنكتىندە وزبەكستان مەن قازاقستان ديپلوماتتارىنا تابىستالدى"، - دەپ جازىلعان حابارلامادا.
11 ساۋىردە وزبەكستان مەن قازاقستاننىڭ تايلاندتاعى ديپلوماتيالىق وكىلدىكتەرىنىڭ كومەگىمەن 2 وزبەكستان ازاماتى، 4 قازاقستان ازاماتى جانە 7 قىرعىزستان ازاماتى وتانىنا ورالدى.
