بۇل تۋرالى قازاقپاراتقا بەرگەن سۇحباتىندا دانياردىڭ باپكەرى، ءارى اكەسى مارات ەلەۋسىنوۆ ايتتى.
«بۇگىن دانيار حالىقتىڭ ءۇمىتىن اقتادى. سول ءۇشىن قاتتى قۋانىپ جاتىرمىز. مەن عانا ەمەس، بۇكىل قازاق ەلى قۋانىپ جاتىر. دانيار مەنىڭ عانا بالام ەمەس، ول بۇكىل حالىقتىڭ بالاسى»، – دەپ اتاپ ءوتتى مارات ەلەۋسىنوۆ.
سونداي-اق، فينالداعى قارسىلاسى مەن جەكپە-جەك تۋرالى دا ءوز ويىمەن ءبولىستى.
— وزدەرىڭىز بىلەسىزدەر! دانيار جارتىلاي فينالدا ۇلكەن جاراقات الدى. قاباعى تۋرا كوزىنىڭ جانىنان تەرەڭ جىرتىلىپ كەتتى.
جىرتىلعان جەرىن ءبىر ەمەس، ەكى رەت تىكتىردىك. فينالدا وتە قيىن بولادى-اۋ، دەپ قورىققانىمىزدا جاسىرىن ەمەس.
سەبەبى، قارسىلاسى ونىڭ جارالانعان جەرىن كوزدەپ سوققى جاسايتىنى انىق ەدى.
سوسىن، ءبىز دانيارعا قارسىلاسىن جاقسىلاپ زەرتتەپ، وزگەشە ءايلا-تاسىل جاساۋدى تاپسىردىق. تەك اياقپەن جۇمىس ىستەپ، قارسىلاسىڭا شەگىنە ءجۇرىپ سوققى جاسا، بىردەن ءوزىڭ العا ۇمتىلما دەگەن بولاتىنبىز.
ول تاپسىرمانى ويداعىداي ورىندادى. وزىنە كوپ سوققى دارىتپادى. سونىڭ ناتيجەسىندە جەڭىسكە جەتتى، – دەدى دانياردىڭ اكەسى.
