جەردى وڭدەۋدىڭ جاڭا ءارى ءتيىمدى ءتاسىلىن قولدانۋدىڭ ناتيجەسىندە ماقتاارالداعى 95 مىڭ گەكتار جەرگە سەبىلگەن ءشيتتى ماقتادان ورتاشا ەسەپپەن گەكتارىنا 21-24 سەنتنەردەن ءونىم الۋ كوزدەلىپ وتىر. بۇگىندە اۋدانداعى ماقتا قابىلداۋ بەكەتتەرىنە 15 مىڭ توننادان استام اق التىن كەلىپ تۇسكەن بولسا، ديقاندار تەرىم بىتكەنشە 200 مىڭ توننا اق ۇلپا جيناپ الۋدى جوسپارلاۋدا.
بيىلعى ماقتا كەلىسىنىڭ باعاسى — 165 تەڭگە. باسەكەلەستىك ورتادا ماقتانىڭ باعاسى 200 تەڭگەگە دەيىن كوتەرىلەدى دەگەن بولجام بار.
جالپى بيىل وڭتۇستىك قازاقستاندا 134،6 مىڭ گەكتار جەرگە ماقتا ءشيتى سەبىلگەن. بۇل وتكەن جىلمەن سالىستىرعاندا 25 مىڭ گەكتارعا ارتىق. 2016 جىلى شارۋالار ءار گەكتارىنا ورتاشا ەسەپپەن 26،2 سەنتنەردەن ءونىم الىپ، بارلىعى 286،4 مىڭ توننا اق ۇلپا جيناعان. ەگىس كولەمىنىڭ ارتۋىنا بايلانىستى وڭىردە 300 مىڭ توننادان استام ماقتا جينالادى دەپ جوسپارلانۋدا.
وقو وڭىرلىك كوممۋنيكاسيالار قىزمەتىنىڭ ۇيىمداستىرۋىمەن وتكەن اقپاراتتىق تۋر كەزىندە جۋرناليستەر ماقتالى ايماقتاعى مەملەكەتتىك باعدارلامالاردىڭ اياسىندا كومەك الىپ، ءوندىرىسىن كەڭەيتىپ، اۋداننىڭ الەۋمەتتىك-ەكونوميكالىق دامۋىنا ايتارلىقتاي اتسالىسىپ جۇرگەن ءبىرقاتار شارۋاشىلىقتار مەن ءوندىرىس وشاقتارىن ارالاپ، جۇمىسىمەن تانىساتىن بولادى.
وقو اكىمىنىڭ باسپا ءسوز قىزمەتى
