ەكسپو قارساڭىندا ۇشاق ىشىندە ءتارتىپ بۇزىپ، باياعى ادەتىنە باسقان ەلىمىزدىڭ ەركە بالاسى ماقسات ۇسەنوۆ جاۋاپقا تارتىلاتىن بولىپتى. بۇل تۋراسىندا ق ر ينۆەستيسيا جانە دامۋ مينيسترلىگىنىڭ وكىلى مۇرات جۇمانباي ءوزىنىڭ فەيسبۋكتاعى پاراقشاسىندا مالىمدەدى.
مينيستىرىلىكتىڭ رەسمي وكىلى: “ق ر ينۆەستيسيا جانە دامۋ مينيسترلىگى ازاماتتىق اۆياسيا كوميتەتى ماقسات ۇسەنوۆتى جاۋاپكەرشىلىككە تارتادى. 2017 جىلى 16 ماۋسىمدا كوميتەت قىزمەتكەرلەرى ماقسات ۇسەنوۆتىڭ ارەكەتىنە بايلانىستى اكىمشىلىك حاتتاما تولتىردى. ول ۇشاقتا شۋ شىعارىپ، ۇشۋ ساپارىنا ءقاۋىپ توندىرگەنى ءۇشىن ايىپتالىپ وتىر”، – دەپ تۇسىنىكتەمە بەرىپتى.
ەندى ماكەڭدى قانداي جازا كۇتىپ تۇرعانى جايىندا ايتساق. مۇنداي جاعدايدا ونى 200 ايلىق ەسەپتىك كورسەتكىش (453 800 تەڭگە) ايىپپۇل تولەۋ نەمەسە 15 تاۋلىككە قامالۋى ىقتيمال.
كۇنى كەشە عانا الماتى قالالىق اكىمشىلىك سوتى ۇسەنوۆتىڭ ۇشاقتاعى تارتىپسىزدىك ارەكەتىنە بايلانىستى ونى 10 كۇنگە قاماۋعا الۋ تۋرالى شەشىم شىعارىپتى. كۋاگەرلەردىڭ ايتۋىنشا، ۇسەنوۆ اۋە ساپارى كەزىندە بالاعات سوزدەر ايتىپ، قاۋىپسىزدىك جونىندەگى ەكيپاج تالابىن ورىنداۋدان باس تارتىپ، جولاۋشىلاردىڭ ساپارى ءۇشىن قولايسىز جاعداي تۋدىرعان. ول سوت وتىرىسىندا ءوز كىناسىن ءىشىنارا عانا مويىنداعان.
سوڭعى ەكى-ۇش جىلدا سوتتىڭ ەسىگىن توزدىرعان ماقساتجان بۇگىندە ءوزىن قالاي قورعاۋدى ۇيرەنىپ الۋى مۇمكىن.
ەكسپو كەزىندە ەلىمىزدە الەمگە تانىتامىز دەپ ءبارىمىز جانىمىزدى سالىپ جۇمىس ىستەپ جاتقاندا ۇسەنوۆتىڭ شۋ شىعارىپ، ەلدىڭ نازارىن تاعى دا وزىنە اۋدارعانىن استە كەشىرۋگە بولمايدى.
كۇنى كەشە عانا ءبىزدىڭ بيلىك ەكسپو-عا كەلگەن مەيماندى اۋەجايدان قوناق ۇيگە دەيىن قوماقتى اقشاعا اپارىپ ۇياتقا قالعان استانانىڭ تاكسيستىن تاۋىپ، جازالادى ەمەس پە؟ بىزدىڭشە، ماقسات ۇسەنوۆ سول قاراپايىم تاكسيستتەن اۋليە ەمەس. ول بۇل جولى تاعى دا جەڭىل جازامەن قۇتىلىپ كەتپەۋى كەرەك. ەرتەڭ ءتيىستى ورىندار "جاۋاپكەرشىلىككە تارتاتىن زاڭىمىمىز تىم جۇمساق بولىپ ماكەڭدى جازاعا تارتا المادىق" دەپ زاڭىمىزدى تاعى دا وزگەرتپەسىن. دەگەنمەن ۇسەنوۆكە راحمەت، زاڭىمىزدىڭ قانداي ولقى تۇستارى بار ەكەنىن قوعام الدىندا ايقىنداپ، ونى قاتايتۋعا اسەر ەتىپ جۇرگەنىن مويىنداۋىمىز كەرەك.
نۇرلان جۇماحان
(جازبا اۆتوردىڭ فەيسبۋكتاعى پاراقشاسىنان الىندى)
https://dalanews.kz/26043
