باسقارما «Sky Way» قازاقستاندىق تۋروپەراتورىنىڭ قولداۋىمەن مالايزيانىڭ 12 جەتەكشى تۋريستىك وپەراتورلارىنا ارنالعان اقپاراتتىق تۋر وتكىزدى. تۇركىستان ءوڭىرىنىڭ ءتۋريزمىن دامىتۋعا ارنالعان شارا اياسىندا وبلىستىڭ باستى كورنەكتى نىساندارىنا «ۇلى جىبەك جولى» تاقىرىبىندا ەكسكۋرسيا ۇيىمداستىرىلدى.
ۇيىمداستىرۋشىلار اقپاراتتىق تۋردىڭ ءوزارا ىنتىماقتاستىقتى كەڭەيتۋگە جانە مالايزيادان قازاقستان رەسپۋبليكاسىنا تۋريستەردى تارتۋعا قوسىمشا سەرپىن بەرەتىنىنە سەنىمدى ەكەندىگىن جەتكىزدى.
ايتا كەتەرلىگى، اعىمداعى جىلدىڭ 27 اقپانىندا كۋالا-لۋمپۋر قالاسىندا «قازاقستان رەسپۋبليكاسىنداعى جاڭا بيزنەس مۇمكىندىكتەرى» فورۋمى وتكەن ەدى. سول فورۋمدا تۇركىستان وبلىسىنىڭ تۋريزم جانە سىرتقى بايلانىستار باسقارماسى (MATTA) مالايزيالىق تۋريستىك اگەنتتىكتەر قاۋىمداستىعىنىڭ باس حاتشىسى ن.ۆونگپەن كەلىسىمگە كەلگەن بولاتىن. مىنە سول كەلىسىمگە سايكەس، مالايزيانىڭ جەتەكشى تۋريستىك كومپانيالارى مەن بۇقارالىق اقپارات قۇرالدارىنىڭ وكىلدەرى ءۇشىن قازاقستاندا، ونىڭ ىشىندە تۇركىستان وبلىسىندا دا اقپاراتتىق تۋر ۇيىمداستىرىلىپ وتىر. وسى تۋر ارقىلى وڭىرگە مالايزيادان كەلەتىن ساياحاتشىلار سانى ارتادى دەگەن سەنىم بار.
