مەملەكەت باسشىسى قاسىم-جومارت توقايەۆ قازاقستان حالقى اسسامبلەياسىنىڭ ءحححىV سەسسياسىندا قازىرگى ساياسي احۋال تۋرالى ايتتى، - دەپ حابارلايدى Dalanews.kz.

پرەزيدەنتتىڭ ايتۋىنشا، قازىرگى كۇردەلى جاعدايدى جەكە مۇددەسىنە پايدالانعىسى كەلەتىن ءتۇرلى پوپۋليستەر مەن ساياساتكەرسىماقتار بار.

"ەل مۇددەسىنە قاستىق ويلاعان ونداي ادامدارعا تۇتاس قوعام بولىپ قارسى تۇرۋىمىز كەرەك. الدا كۇردەلى كەزەڭ كەلە جاتىر. وڭاي بولمايدى. ءبىراق الاڭداۋعا ەش نەگىز جوق. مەن كوپ جاعدايدا «بۇل قيىندىق تا ارتتا قالادى» دەپ اشىق ايتامىن. سول ءسوزىمدى وسى جەردە تاعى قايتالاعىم كەلەدى. ءبىز سىن-قاتەردىڭ ءبارىن ەڭسەرىپ كەلەمىز. بۇل جولى دا سولاي بولادى. ەڭ باستىسى، بارىنشا جيناقى بولىپ، ناقتى ناتيجەگە ۇمتىلۋىمىز كەرەك. كەز كەلگەن اۋقىمدى داعدارىستان كەيىن زور مۇمكىندىكتەرگە جول اشىلادى. سول مۇمكىندىكتەردى دەر كەزىندە ءارى دۇرىس پايدالانۋ قاجەت. ءوز كۇشىمىزگە عانا ارقا سۇيەپ، بارلىق رەسۋرستى ورتاق ماقساتقا جۇمىلدىرۋىمىز كەرەك. بوس سوزگە ۇرىنىپ، بايبالامعا سالىنباي، جاسامپاز بولعانىمىز ابزال. ءار ازاماتتىڭ بويىندا جاۋاپكەرشىلىك سەزىمى وتە جوعارى بولۋعا ءتيىس. قوعامدا ءوزارا تىلەۋلەستىك بولۋى كەرەك. ءار ىستە تەمىردەي ءتارتىپ بولۋى قاجەت. سوندا ەلىمىز دە وراسان زور تابىسقا جەتەدى. بارشاڭىزعا ءمالىم، زاڭ مەن ءتارتىپ – مەنىڭ ستراتەگيالىق باعدارىمنىڭ ارقاۋى. مەن ءار سويلەگەن سوزىمدە وسى قاعيداتتارعا ارنايى توقتالامىن. تازا قازاقستان، زاڭ مەن ءتارتىپ، ادال ازامات يدەيالارىنىڭ وزەگى دە – وسى"، - دەدى توقايەۆ.