بيىلعى 1 قىركۇيەكتە مەملەكەت باسشىسى قاسىم-جومارت توقايەۆ قازاقستان حالقىنا جولداۋىن جاريالاعانىن بىلەسىزدەر.
ونداعى ماڭىزدى ساياسي باستامالاردىڭ ءبىرى – پرەزيدەنتتىڭ مانداتىن قايتا سايلانۋ قۇقىعىنسىز جەتى جىلدىق ءبىر مەرزىممەن شەكتەۋ.
ءماجىلىس دەپۋتاتتارى وسىعان قاتىستى تۇزەتۋلەردى كونستيتۋسياعا ەنگىزۋ ماسەلەسىن جەدەلدەتۋدى ۇسىندى.
ولاردىڭ پايىمداۋىنشا، جاڭا نورمالاردى پرەزيدەنت سايلاۋىنا دەيىن قابىلداعان ءجون. ايتپەسە، كونستيتۋسيانىڭ قازىرگى ەرەجەلەرى بويىنشا وسى كۇزدە پرەزيدەنت بولىپ سايلاناتىن ادامعا جەتى جىلدىق مەرزىمگە قايتا سايلانۋعا مۇمكىندىك بەرەتىن زاڭدى جاعدايلار تۋىنداۋى مۇمكىن.
مەملەكەت باسشىسىنىڭ باستامالارىن جۇزەگە اسىرۋ ءۇشىن كونستيتۋسياعا تۇزەتۋلەر ەنگىزۋ قاجەت. وسىعان بايلانىستى، ءماجىلىس دەپۋتاتتارىنىڭ ۇسىنىسىمەن ءتيىستى زاڭ جوباسى ازىرلەندى.
زاڭ جوباسىندا پرەزيدەنت وكىلەتتىگىنىڭ جەتى جىلدىق مەرزىمى تۋرالى جانە ونىڭ ءبىر رەتتەن ارتىق سايلانا المايتىنى جونىندەگى نورمالاردى كەيىن وزگەرتۋگە جول بەرمەيتىن ەرەجە ەنگىزۋ دە كوزدەلگەن.
ءبىر ادامنىڭ ءبىر رەت قانا سايلاناتىنى تۋرالى نورما كونستيتۋسياعا ەنگىزىلەتىن تۇزەتۋ كۇشىنە ەنگەننەن كەيىنگى پرەزيدەنت سايلاۋىندا مەملەكەت باسشىسى بولىپ سايلاناتىن ادامدارعا قولدانىلاتىن بولادى.
كونستيتۋسياعا تۇزەتۋلەر الداعى سايلاۋعا جانە پرەزيدەنت جەتى جىلدىق مەرزىمگە سايلانعانعا دەيىن قابىلدانسا، وسى جولى پرەزيدەنت اتاناتىن ازامات ءۇشىن جانە ودان كەيىنگى بارلىق مەملەكەت باسشىلارى ءۇشىن پرەزيدەنت سايلاۋىنا قايتا قاتىسۋ مۇمكىندىگى زاڭمەن شەكتەلەدى.
پرەزيدەنت وكىلەتتىگىنىڭ جەتى جىلدىق مەرزىمى بەلگىلەنۋىنە بايلانىستى وسى زاڭ جوباسىندا كونستيتۋسيالىق سوت سۋديالارىنىڭ قىزمەت مەرزىمىن التى جىلدان سەگىز جىلعا ۇزارتۋ ۇسىنىلدى. ولار دا بۇل لاۋازىمعا قايتا تاعايىندالمايتىن بولادى.
الەمنىڭ كوپتەگەن مەملەكەتتەرىندە كونستيتۋسيالىق سوت سۋديالارىنىڭ وكىلەتتىك مەرزىمى ولاردى تاعايىندايتىن تۇلعالاردىڭ، ياعني پرەزيدەنتتىڭ جانە پارلامەنت دەپۋتاتتارىنىڭ وكىلەتتىك مەرزىمىنەن ۇزاعىراق بولادى.
كونستيتۋسيالىق سوت سۋديالارىنىڭ وكىلەتتىك مەرزىمى ولاردىڭ ءتۇرلى ساياسي كۇشتەردىڭ ىقپالىنان تاۋەلسىز بولۋىنا باستى كەپىلدىك بولىپ سانالادى.
كونستيتۋسيالىق سوت 2023 جىلعى 1 قاڭتاردان باستاپ جۇمىس ىستەي باستايدى. سوندىقتان، ونىڭ سۋديالارىنىڭ وكىلەتتىك مەرزىمىن ۇلعايتۋ تۋرالى شەشىمدى قازىردەن-اق قابىلداعان ماڭىزدى بولماق.
اتا زاڭىمىزدىڭ 91-بابىنىڭ 3-تارماعىنا سايكەس زاڭ جوباسى كونستيتۋسيالىق كەڭەسكە جولداندى.
كەڭەس نەگىزگى زاڭعا ەنگىزىلگەلى وتىرعان تۇزەتۋلەردىڭ كونستيتۋسيانىڭ 91-بابىنىڭ 2-تارماعىندا بەلگىلەنگەن تالاپتارعا سايكەستىگىنە قورىتىندى بەرەدى.
https://dalanews.kz/news/81303-duniening-dinggeni-din
https://dalanews.kz/kogam/81206-amanat-partiiasynyng-40-kundik-auyl-amanaty
