جامبىل پوليتەحنيكالىق جوعارى كوللەدجىنىڭ ديرەكتورى دۇيسەنبەك ءابدىرايىموۆ پارا الىپ جاتقان جەرىندە ۇستالدى، - دەپ حابارلايدى Dalanews.kz.
بۇل تۋرالى Orda.kz دەرەككوزدەرى حابارلاعان. انتيكوردا ازىرگە بۇل جايلى رەسمي اقپارات جوق.
كوللەدج ديرەكتورى پارا رەتىندە ناقتى قانشا العانى بەلگىسىز. ءابدىرايىموۆ اقشانى كوللەدجدە گرانت بەرۋ ءۇشىن العان.
دۇيسەنبەك ءابدىرايىموۆ 63 جاستا. التى جىل بويى وبلىستىق ءبىلىم باسقارماسىن باسقاردى. كەيىن جامبىل پوليتەحنيكالىق كوللەدجىن باسقاردى. 1998 جىلدان 2004 جىلعا دەيىن جۇمىس ىستەگەندە ءابدىرايىموۆتار وتباسى ەكى جاتاقحانا عيماراتىن جەكەشەلەندىردى. سونىڭ نەگىزىندە پوليتەحنيكۋم باستىعىنىڭ ەكى قىزى كوللەدج اشتى.
ەسكە سالايىق، بيىل جوعارى وقۋ ورىندارىنداعى مەملەكەتتىك گرانتقا قاتىستى شۋ بولعان ەدى. بىرنەشە تۇلەك سۋ باسقان وڭىرلەر ءۇشىن بولىنگەن كۆوتانىڭ كەسىرىنەن جوعارى بالل جيناسا دا مەملەكەتتىك گرانتقا ىلىكپەي قالعان. تالاپكەرلەر عىلىم جانە جوعارى ءبىلىم مينيسترلىگىن سوتقا بەردى.
بۇل تۋرالى بەلگىلى قۇقىق قورعاۋشى حاليدا ءاجىعۇلوۆا الەۋمەتتىك جەلىدەگى پاراقشاسىندا جازدى.
ءاجىعۇلوۆانىڭ ايتۋىنشا، كەشە العاشقى تالاپكەر عىلىم مينيسترلىگىنە قارسى اكىمشىلىك ارىز تۇسىرگەن.
«وكىنىشكە قاراي، مينيسترلىك ءوز قاتەلىگىن ءالى مويىنداماي وتىر، زاڭنامانى بۇزىپ تج كۆوتاسىن رۇقساتسىز ەنگىزۋگە قۇقىلىمىز دەپ سانايدى. ءبىراق مينيسترلىك ءوز كۇشىمەن جەڭىپ تۇرعان گرانتتارىنان زاڭسىز ايىرىلعان تالاپكەرلەردى ۇنەمى كوزگە ىلمەي جۇرە بەرە المايدى. گرانت ءۇشىن جىلدار بويى ەڭبەك ەتكەن بالالاردىڭ قۇقىعىن شەكتەپ، تاسقىننان زارداپ شەككەن باسقا بالالارعا كومەكتەسۋگە بولمايدى. باسقانىڭ ەسەبىنەن قايىرىمدىلىق جاساۋعا بولمايدى»، - دەپ جازدى قۇقىق قورعاۋشى.
ءاجىعۇلوۆانىڭ سوزىنشە، ۋنيۆەرسيتەتتەر جوعارى بالل العانىنا قاراماستان كەيبىر بالالارعا ىشكى گرانتتاردى بەرۋدەن باس تارتقان. ال وتباسىلاردىڭ ولاردى وقىتۋعا اقشاسى جوق.
