كەنتاۋ قالاسىندا 2024 جىلدىڭ 9 ايىندا ونەركاسىپ ءونىمىنىڭ كولەمى 37،1 ملرد تەڭگەنى قۇراعان. سونداي-اق، وڭدەۋ ونەركاسىبىندە 32،4 ملرد تەڭگەنىڭ ءونىمى وندىرىلسە، اۋىلشارۋاشىلىعى سالاسىنداعى جالپى ءونىم كولەمى 9،1 ملرد تەڭگەگە جەتكەن، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
جالپى قالادا ونەركاسىپ سالاسىندا اعىمداعى جىلدىڭ 9 ايىندا ينۆەستيسيالىق قۇنى 859 ملن تەڭگەنى قۇرايتىن 3 جوبا جۇزەگە اسقان. بۇل جايىندا كەنتاۋ قالاسىنىڭ اكىمى جاندوس تاسوۆ ب ا ق وكىلدەرىمەن وتكەن بريفينگتە مالىمدەدى.
– كەنتاۋدا ونەركاسىپ سالاسىن دامىتۋ بويىنشا جىل سوڭىنا دەيىن تاعى 4 جوبا اشۋ جوسپارلانۋدا. ولاردىڭ ينۆەستيسيالىق قۇنى 1 ملرد 791 ملن تەڭگەنى قۇراپ وتىر. بۇل تىزىمدە قۇنى 1،5 ملرد تەڭگەلىك «كەنتاۋ Red Star» جشس-ڭ قىش وندىرەتىن زاۋىتى دا بار. جىلىنا 45 ملن دانا قىش شىعارۋعا قاۋقارلى ءوندىرىس ورنى 10 ادامدى تۇراقتى جۇمىسپەن قامتىماق. سونىمەن قاتار، وڭىردەگى يندۋستريالدى ايماقتا «حالتايەۆ» جك مەتالل تور مەن قۇرىلىس بلوكتارىن شىعارۋ زاۋىتى ىسكە قوسۋدى جوسپارلاپ وتىر. اتالعان جوبا ارقىلى تاعى دا 10 ادام تۇراقتى جۇمىسپەن قامتىلىپ، جىلىنا 50 مىڭ دانا بلوك پەن 1 000 مەتالل تور وندىرىلمەك، – دەدى قالا باسشىسى.
سونداي-اق، كەنتاۋ قالاسىنداعى ينفراقۇرىلىم سالاسىندا دا وڭ وزگەرىستەر جەتەرلىك. ماسەلەن، قالا اۋماعىندا ەلدى مەكەندەر 100% اۋىز سۋمەن قامتىلعان. سونىمەن قاتار، جىل باسىنان بەرى ەلەكتر جەلىلەرىن جاڭارتۋ ماقساتىندا 7 دانا ترانسفورماتور اۋىستىرىلىپ، 15،3 شاقىرىم جەلىنى قايتا قۇرۋ جۇمىستارى جۇرگىزىلۋدە. بۇدان بولەك، جىل سوڭىنا دەيىن تۇرعىنداردى تابيعي گازبەن قامتۋ كورسەتكىشىن 93%-عا جەتكىزۋ جوسپارلانعان.
توعىز ايدىڭ قورىتىندىسىمەن 18 000 ابونەنتتىڭ 14 981ء-ى، ياعني 83%-ى تابيعي گاز جۇيەسىنە قوسىلدى. وڭىردەگى جول ماسەلەسى دە وڭتايلى شەشىمىن تاۋىپ كەلەدى. بۇگىندە كەنتاۋ قالاسى جانە وعان قاراستى اۋىلدارداعى 365 شاقىرىم كوشەنىڭ 82،1%-ى قاناعاتتانارلىق جاعدايدا. جىل سوڭىندا بۇل كورسەتكىشتى 87،7 %-عا جەتكىزۋ كوزدەلگەن.
سونىمەن قاتار، وڭىردەگى تۇرعىن ءۇي ماسەلەسى دە كۇن تارتىبىنەن تۇسكەن ەمەس. بۇگىندە قالادا 5 117 ازامات باسپانا كەزەگىنە تىركەلگەن. قازىرگى تاڭدا اتالعان ماسەلەنى شەشۋ ماقساتىندا 60 پاتەرلى 5 قاباتتى تۇرعىن ءۇيدىڭ جانە 30 پاتەرلىك 2 تۇرعىن ءۇيدىڭ قۇرىلىسى جۇرگىزىلۋدە.
