ماڭعىستاۋ وبلىسىنىڭ كاسپيي تەڭٸزٸ جاعالاۋىندا بالىقتىڭ جاپپاي قىرىلعانى انىقتالدى. بۇل تۋرالى ٶڭٸردٸڭ ەكولوگييا دەپارتامەنتٸ حابارلادى, دەپ حابارلايدى Dalanews.kz.
فورت-شەۆچەنكو قالاسىنىڭ تٷپقاراعان اۋدانى اۋماعىندا تەڭٸز جاعالاۋىنان تابىلعان ٶلٸ بالىقتاردىڭ ۆيدەوسى ەلەۋمەتتٸك جەلٸلەرگە جارييالاندى.
7 شٸلدە كٷنٸ وقيعا ورنىنا وبلىستىق ەكولوگييا دەپارتامەنتٸنٸڭ زەرتحانالىق-تالدامالىق باقىلاۋ بٶلٸمٸنٸڭ ماماندارى باردى. ولار بالىق شارۋاشىلىعى باسقارماسىنىڭ قىزمەتكەرلەرٸمەن بٸرگە تەڭٸز سۋىنان سىنامالار الدى.
ەكولوگتار زەرتتەۋ نەتيجەلەرٸن قوسىمشا حابارلايتىنىن ايتتى.
ەسكە سالا كەتەيٸك, 1 مامىر كٷنٸ كاسپيي جاعالاۋىنان 88 يتبالىقتىڭ ٶلٸگٸ تابىلعان بولاتىن. ال 9 مامىردا تٷپقاراعان اۋدانىنىڭ تۇرعىندارى تاعى ونداعان ٶلٸ يتبالىق پەن قۇستى بايقاپ, دابىل قاققان.
مامىر ايىنىڭ سوڭىندا فورت-شەۆچەنكو قالاسى ماڭىنداعى جاعالاۋدا ەكٸ كٷننٸڭ ٸشٸندە 117 ٶلٸ يتبالىق تابىلدى. بالىق شارۋاشىلىعى كوميتەتٸنٸڭ مەلٸمەتٸنشە, بۇل جانۋارلار 2024 جىلدىڭ قاراشا-جەلتوقسان ايلارىندا ٶلگەن.
