كابينەتىندە ايەل زورلادى دەگەن كۇدىككە ىلىنگەن تالدىقورعان پوليسياسىنىڭ ەكس-باسشىسى مارات كۇشتىبايەۆتى سوت زالىنان جەدەل جاردەم كولىگىمەن الىپ كەتتى، - دەپ حابارلايدى Dalanews.kz.
جەتىسۋ وبلىستىق سوتىنىڭ باسپا ءسوز قىزمەتى سوت وتىرىسى كەزىندە سوتتالۋشى كۇشتىبايەۆتى جەدەل جاردەم كولىگىمەن الىپ كەتكەنى تۋرالى اقپاراتتى راستادى.
"قازىرگى ۋاقىتتا سوتتالۋشى كارديولوگيالىق ورتالىقتا دارىگەرلەردىڭ باقىلاۋىندا. وسىعان بايلانىستى سوت وتىرىسى كەيىنگە شەگەرىلدى"، - دەلىنگەن حابارلامادا.
ايتا كەتەيىك، بىلتىر قاراشادا تالدىقورعان پوليسيا باسقارماسىنىڭ باسشىسى ايەل زورلادى دەگەن كۇدىككە ىلىنگەن ەدى.
ىشكى ىستەر مينيسترلىگىنىڭ باسشىسى ەرجان سادەنوۆ تالدىقورعان پوليسياسى باستىعىنىڭ كابينەتىندەگى زورلاۋ دەرەگى بويىنشا مالىمدەمە جاسادى. ول ەل ازاماتتارىنىڭ كونستيتۋسيالىق قۇقىقتارىن قورعايتىن پوليسيا قىزمەتكەرى ءۇشىن زاڭ مەن ءتارتىپ ءبىرىنشى ورىندا بولۋى كەرەگىن ايتتى.
وسى وقيعادان كەيىن جەتىسۋ وبلىستىق پوليسيا دەپارتامەنتىنىڭ باستىعى اتىعاي ارىستانوۆ قىزمەتىنەن بوساتىلدى. ونىڭ ءبىرىنشى ورىنباسارى جاسۇلان بايكەنوۆكە ەسكەرتۋ بەرىلدى. وبلىستىق دەپارتامەنت باستىعىنىڭ كادر ساياساتى جونىندەگى ورىنباسارى تالانت جۇمابەكوۆ پەن تەرگەۋ بويىنشا ورىنباسارى ماقسات ەرەجەپوۆ تە ءوز قىزمەتتەرىنەن بوساتىلدى.
