اتىراۋ مۇناي وڭدەۋ زاۋىتىنىڭ (ءاموز) باسپا ءسوز قىزمەتى كاسىپورىننىڭ باس ديرەكتورى عالىمجان جۋسانبايەۆقا قاتىستى قىلمىستىق ءىس قوزعالدى دەگەن اقپاراتتى جوققا شىعاردى، دەپ حابارلايدى Dalanews.kz.
“Ulysmedia Telegram-ارناسىندا جانە باسقا دا دەرەككوزدەردە اتىراۋ مۇناي وڭدەۋ زاۋىتىنىڭ باسشىسى عالىمجان جۋسانبايەۆقا قاتىستى قىلمىستىق تەرگەۋ باستالدى دەگەن اقپاراتقا بايلانىستى رەسمي تۇردە مالىمدەمە جاسايمىز. بۇل اقپاراتتار شىندىققا جاناسپايدى جانە جالعان”، – دەلىنگەن حابارلامادا.
قازىرگى ۋاقىتتا “ءاموز” ج ش س جانە ونىڭ باسشىلىعىنا قۇقىق قورعاۋ ورگاندارىنان ەشقانداي رەسمي حابارلاما نەمەسە سۇراۋ كەلىپ تۇسپەگەنى ايتىلعان.
“قىلمىستىق تەرگەۋ ءجۇرىپ جاتىر دەگەن اقپارات – زاۋىت پەن ونىڭ قىزمەتكەرلەرىنىڭ بەدەلىن تۇسىرۋگە باعىتتالعان الىپ-قاشپا اڭگىمە”، – دەلىنگەن حابارلامادا.
ەسكە سالساق، بۇعان دەيىن الەۋمەتتىك جەلىدە اموز-دەگى جاعدايعا قاتىستى شاعىمدار جاريالانعان بولاتىن. مۇندا زاۋىت باسشىسى قىزمەتىن اتقارعان عالىمجان جۋسانبايەۆ ءارتۇرلى زاڭبۇزۋشىلىق جاسادى دەپ ايىپتالعان. “قازمۇنايگاز” بۇل ماسەلەنى زەرتتەۋ ءۇشىن زاۋىتقا ارنايى كوميسسيا جىبەرۋگە ۋادە بەرگەن. ناتيجەسىندە، جۋسانبايەۆ پەن زاۋىتتىڭ باس ينجەنەرى ادىلەت شوشانباسوۆ ءوز لاۋازىمدارىنان بوساتىلعان.
27 اقپاندا قارجىلىق مونيتورينگ اگەنتتىگى ءاموز باسشىلىعىنا قاتىستى قىلمىستىق ءىس قوزعالعانىن حابارلادى.
كەيىنىرەك جۋسانبايەۆ كاسىپورىندا سابوتاج بولعانىن ايتىپ، ءوزى تۋرالى ارىزداعى مالىمەتتەردى جوققا شىعاردى.
ءسويتىپ 2024 جىلدىڭ ماۋسىمىندا اتىراۋ مۇناي وڭدەۋ زاۋىتىنىڭ ەكس-ديرەكتورى سوت شەشىمىمەن جۇمىسىنا قايتا ورالدى.
استانا قالاسىنىڭ ازاماتتىق ىستەر جونىندەگى اۋدانارالىق سوتىنىڭ شەشىمىمەن اتىراۋ مۇناي وڭدەۋ زاۋىتىنىڭ بۇرىنعى باس ديرەكتورى عالىمجان جۋسانبايەۆتىڭ قۇقىعى قورعالدى.
"استانا قالاسىنىڭ ازاماتتىق ىستەر جونىندەگى اۋدانارالىق سوتى ج.-نىڭ قاتىسۋشىلاردىڭ كەزەكتەن تىس جالپى جينالىسىنىڭ حاتتاماسىن، ەڭبەك شارتىن بۇزۋ تۋرالى بۇيرىقتىڭ جارامسىز دەپ تانۋ، باس ديرەكتور لاۋازىمىن قالپىنا كەلتىرۋ، ءماجبۇرلى جۇمىستان شىعۋ ۋاقىتى ءۇشىن جالاقىنى ءوندىرىپ الۋ جانە مورالدىق زياندى وتەۋ تۋرالى «ءاموز» جشس-نە قاتىستى تالابىن قارادى. تالاپ قويۋ ەڭبەك شارتىنىڭ سىناق مەرزىمىندە جانە قىزمەتكەردىڭ ۋاقىتشا ەڭبەككە جارامسىزدىق كەزىندە بۇزىلۋىمەن نەگىزدەلدى. سوتپەن ەڭبەك شارتىنىڭ تالاپتارى بويىنشا تالاپكەرگە 6 اي سىناق مەرزىمى بەلگىلەنگەنى، الايدا شارت 1 اي وتكەننەن كەيىن بۇزىلعانى انىقتالدى. وسى قۇقىقتىق قاتىناستارعا ەڭبەك زاڭناماسى قولدانىلادى"، -دەپ حابارلادى سوتتان.
ەڭبەك كودەكسىنىڭ 36-بابىنا سايكەس، ەڭبەك شارتىندا جۇمىسكەردىڭ تاپسىرىلاتىن جۇمىسقا بىلىكتىلىگىنىڭ سايكەستىگىن تەكسەرۋ ماقساتىندا سىناق مەرزىمى تۋرالى تالاپ بەلگىلەنۋى مۇمكىن.
وسى كودەكستىڭ 37-بابىنا سايكەس، جۇمىسكەردىڭ سىناق مەرزىمى كەزەڭىندەگى جۇمىسى تەرىس ناتيجە بەرگەن كەزدە جۇمىس بەرۋشى وعان ەڭبەك شارتىن بۇزۋعا نەگىز بولعان سەبەپتەر كورسەتىلگەن حابارلاما بەرىپ، ونىمەن ەڭبەك شارتىن بۇزۋعا قۇقىلى.
"بۇل جاعدايدا قىزمەتكەر سىناق مەرزىمىندە جۇمىستىڭ تەرىس ناتيجەسى بولماسادا ەشقانداي سەبەپسىز جۇمىستان بوساتىلدى. سوت شەشىمىمەن تالاپ قاناعاتتاندىرىلدى. سوت جاۋاپكەرمەن قىزمەتكەردىڭ سىناق مەرزىمىندەگى بىلىكتىلىگىنە سايكەس ەمەستىگى دالەلدەنبەگەندىكتەن تالاپكەردىڭ قۇقىقتارى بۇزىلعان دەپ تانىدى. ەڭبەك شارتى جۇمىستان شىعارۋ ءراسىمىن بۇزا وتىرىپ كۇشىن جويعان. ەڭبەك شارتىن بۇزۋ تۋرالى بۇيرىقتى جارامسىز دەپ تانۋ، ج.-نىڭ باس ديرەكتور لاۋازىمىن قالپىنا كەلتىرۋ تۋرالى شەشىم شىعارىلدى. ءماجبۇرلى جۇمىسقا كەلمەگەنى ءۇشىن جالاقىسى جانە 100 000 تەڭگە مولشەرىندە مورالدىق زياندى وتەۋ ءوندىرىلدى"، -دەپ ءمالىم ەتتى سوتتان.
