قازاقستاندا alem.ai battle ۇلتتىق بايقاۋىنا ءوتىنىم قابىلداۋ باستالدى. بۇل تۋرالى جاساندى ينتەللەكت جانە سيفرلىق دامۋ مينيسترلىگى حابارلادى. بايقاۋدا جاساندى ينتەللەكت سالاسىنداعى ۇزدىك جوبالارعا 25 ملن تەڭگە جۇلدە قورى قاراستىرىلعان، دەپ حابارلايدى Dalanews.kz.

ءوتىنىم قابىلداۋ 22 اقپانعا دەيىن جالعاسادى. بايقاۋعا ەلىمىزدىڭ بارلىق وڭىرىنەن مەكتەپ وقۋشىلارى، ستۋدەنتتەر، ستارتاپتار مەن زەرتتەۋشىلەر قاتىسا الادى.

وتىنىمدەر ءتورت نەگىزگى سانات بويىنشا قابىلدانادى:

AI Young Talents – 12–18 جاس ارالىعىنداعى مەكتەپ وقۋشىلارى. قاتىسۋ ءۇشىن جوبانىڭ كەمىندە MVP دەڭگەيىندەگى (ەڭ از فۋنكسيالارى بار تەستىلىك نۇسقا) جۇمىس ىستەيتىن ۇلگىسى بولۋى قاجەت.

AI Driving Power – كوللەدجدەر مەن جوعارى وقۋ ورىندارىنىڭ ستۋدەنتتەرى. قاتىسۋشىلاردا MVP دەڭگەيىندەگى يي جوباسى بولۋى ءتيىس.

AI Future Builders – يي ءونىمى نەمەسە ءپروتوتيپى/MVP بار كوماندالار. جوبانىڭ نارىقتا سۇرانىسقا يە ەكەنىن دالەلدەيتىن ناقتى كورسەتكىشتەرى، سونىڭ ىشىندە اقىلى پيلوتتىق جوبالار مەن ساتىلىمدار بولۋى كەرەك.

AI Innovators – عىلىمي زەرتتەۋلەر مەن ازىرلەمەلەرگە نەگىزدەلگەن، قۇرامىندا جاساندى ينتەللەكت ەلەمەنتتەرى بار جوبالار ۇسىناتىن كوماندالار.

بايقاۋ قورىتىندىسى بويىنشا استانادا وتەتىن فينالعا 20 ۇزدىك كوماندا جولداما الادى. ساراپشىلار القاسى ءار ساناتتان ءبىر جەڭىمپازدى انىقتايدى.

تولىق اقپارات پەن ءوتىنىم بەرۋ astanahub.com سايتىندا قولجەتىمدى.