وڭتۇستىك قازاقستان وبلىسى اكىمدىگىنىڭ كەزەكتى ماجىلىسىندە ايماق باسشىسى ج.تۇيمەبايەۆ بيۋدجەت قارجىسىنىڭ يگەرىلمەۋىنە قاتىستى باسقارما باسشىلارى مەن اۋدان، قالا اكىمدەرىنىڭ جۇمىستارىنا قاناعاتتانارلىقسىز دەگەن باعا بەردى.



بيۋدجەت قاراجاتىن ءتيىمدى جانە مەرزىمىندە يگەرۋ ءاربىر مەكەمە باسشىسىنىڭ باستى ماقساتتارىنىڭ ءبىرى بولۋ كەرەك ەكەنىن ايتقان وبلىس اكىمى قازىنادان بولىنگەن قارجىنى دۇرىس ۇقساتپاعان باسشىلار جازالاناتىنىن جەتكىزدى.

– ءبىزدىڭ وسى باعىتتاعى جۇمىسىمىزدى مەملەكەت باسشىسى مەن ۇكىمەت قاتاڭ باقىلاۋعا العان. وسىعان سايكەس ءبىز بيۋدجەت قاراجاتىن يگەرۋ ماسەلەسىن تۇراقتى تۇردە اي سايىن قاراپ، تالقىلايمىز. الايدا، قارجى باسقارماسىنىڭ بۇگىن جاساعان بايانداماسىنا سايكەس، وبلىستىق باسقارمالاردىڭ جانە اۋدان، قالا اكىمدەرىنىڭ بيۋدجەت قاراجاتىن يگەرۋ باعىتىنداعى جۇمىستارى تومەنگى دەڭگەيدە بولىپ وتىر. سونىمەن قاتار، بىلتىرعى جىلدان بەرى بيۋدجەت قاراجاتىن يگەرۋ بويىنشا بەرىلگەن تاپسىرمالار ورىندالماعانى بەلگىلى بولدى. وسى رەتتە، ءبىرقاتار وبلىستىق باسقارما باسشىلارىنىڭ جانە اۋدان، قالا اكىمدەرىنىڭ بيۋدجەت قاراجاتىن يگەرۋ بويىنشا جۇمىستارىنا قاناعاتتانارلىقسىز دەگەن باعا بەرەمىن، – دەدى ج.تۇيمەبايەۆ.

ماجىلىستە 2017 جىلعى 9 ايدىڭ قورىتىندىسى بويىنشا وبلىس بيۋدجەتىنىڭ اتقارىلۋى تۋرالى ءسوز العان وبلىستىق قارجى باسقارماسى باسشىسىنىڭ مىندەتىن اتقارۋشى ر.مۇلكەمانوۆ وبلىستىق باسقارمالار بويىنشا 209،6 ملن تەڭگە، ال، اۋدان، قالالاردا 559،4 ملن تەڭگە قارجى يگەرىلمەي قالعانىن مالىمدەدى.

– جالپى جىل باسىنان بەرى وبلىستىق قۇرىلىس، ەنەرگەتيكا، اۆتوموبيل جولدارى جانە كاسىپكەرلىك باسقارمالارى قارجىلاندىرۋ جوسپارلارىنا 17،1 ملرد. تەڭگەگە 25 رەت نەگىزسىز وزگەرىستەر ەنگىزگەن. ەگەردە قىركۇيەك ايىنداعى 4،4 ملرد تەڭگە كەيىنگى ايلارعا اۋىستىرىلماعان جاعدايدا اتالعان وبلىستىق بيۋدجەتتىك قارجىنىڭ يگەرۋ دەڭگەيى تومەن بولار ەدى. بۇگىنگى تاڭدا وبلىس بيۋدجەتىنىڭ قارجىسى 99،8 پايىزعا يگەرىلىپ وتىر، – دەدى ر.مۇلكەمانوۆ.

بايانداماشىنىڭ مالىمەتىنشە، ەڭ ءىرى كولەمدە يگەرىلمەگەن قارجى سارىاعاش، سايرام اۋداندارى مەن شىمكەنت قالاسى جانە وبلىستىق ەنەرگەتيكا جانە تۇرعىن ۇي-كوممۋنالدىق شارۋاشىلىق پەن دەنە شىنىقتىرۋ جانە سپورت باسقارمالارىنا تيەسىلى ەكەن.

جيىندى قورىتىندىلاعان ءوڭىر باسشىسى ج.تۇيمەبايەۆ بايانداماداعى دايەكتەرگە سۇيەنە وتىرىپ، باسقارما باسشىلارى مەن اۋدان، قالا اكىمدەرىنە كەمشىلىكتەرگە جول بەرگەن ءتيىستى جاۋاپتى ورىنباسارلارىنا ءۇش كۇن ىشىندە تارتىپتىك شارا كورىپ، ناتيجەسىن بايانداۋدى جانە اۋدان، قالا اكىمدەرىنە وسى جىلدىڭ كىرىس جوسپارىن تولىق ورىندالۋىن قامتاماسىز ەتۋىن تاپسىردى.

سونداي-اق، اكىم اۋدان، قالا باسشىلارىنا  2017 جىلعى بيۋدجەتتە قارالعان قارجىلاردى تولىق يگەرىپ، تۇپكىلىكتى ناتيجەگە قول جەتكىزۋدى، جىل قورىتىندىسىمەن بۇل جۇمىستار تولىق ورىندالماعان جاعدايدا ءبىرىنشى باسشىلارعا قاتاڭ تارتىپتىك شارا كورىلەتىندىگىن ەسكەرتتى.

وقو اكىمىنىڭ باسپا ءسوز قىزمەتى