قازاقستان رەسپۋبليكاسى پرەزيدەنتىنىڭ كەڭەسشىسى مالىك وتاربايەۆ جۇمىس ساپارى اياسىندا جەتىسۋ وبلىسىنىڭ كەربۇلاق اۋدانىنا بارىپ، جەرگىلىكتى تۇرعىندارمەن كەزدەسۋ وتكىزدى. كەزدەسۋدىڭ نەگىزگى تاقىرىبى پرەزيدەنت قاسىم-جومارت توقايەۆتىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى سيفرلىق وزگەرىستەر ارقىلى شەشۋ» اتتى جولداۋىن جۇزەگە اسىرۋ بولدى، دەپ حابارلايدى Dalanews.kz.
كەزدەسۋدە وبلىس اكىمىنىڭ ورىنباسارى دياس ەسداۋلەتوۆ مودەراتورلىق ەتتى. ول وڭىردە تۇراقتى الەۋمەتتىك-ەكونوميكالىق دامۋ، ينفراقۇرىلىمدى جاڭعىرتۋ جانە كەڭەيتۋ، كاسىپكەرلىك باستامالاردى قولداۋ، سونداي-اق قوعامدىق تۇراقتىلىقتى نىعايتۋ باعىتتارى بويىنشا جۇيەلى ءارى كەزەڭ-كەزەڭىمەن جۇرگىزىلىپ جاتقان جۇمىستارعا توقتالدى.
كەربۇلاق اۋدانى اكىمىنىڭ مىندەتىن اتقارۋشى جانات جۇنىسبەكوۆ جولداۋدىڭ ىسكە اسىرىلۋ بارىسى تۋرالى باياندادى. ول جىل باسىنان بەرى بارلىق نەگىزگى الەۋمەتتىك-ەكونوميكالىق كورسەتكىشتەردىڭ وسكەنىن اتاپ ءوتتى. وڭىردەگى ونەركاسىپتىك ءوندىرىس كولەمى قولدانىستاعى كاسىپورىنداردىڭ جوعارى دەڭگەيدەگى جاڭعىرتىلۋىنىڭ ناتيجەسىندە 39،7 ملرد تەڭگەگە جەتتى. ينۆەستيسيالىق جوبالاردىڭ جۇزەگە اسىرىلۋى جانە بيزنەستى دامىتۋعا قولايلى جاعدايلاردىڭ جاسالۋى ارقىلى وڭ قارقىن قامتاماسىز ەتىلۋدە.
اگرارلىق سالا، جاڭا نىسانداردى سالۋ، ءبىلىم بەرۋ جانە دەنساۋلىق ساقتاۋ ينفراقۇرىلىمىن جاڭارتۋدا دا وزگەرىستەر بايقالادى. اۋدانداعى جۇمىسسىزدىق دەڭگەيى 5،1%-دان 4،8%-عا تومەندەدى، ورتاشا ايلىق جالاقى 304 مىڭ تەڭگەنى قۇرادى. الەۋمەتتىك قىزمەتتەردى سيفرلاندىرۋ ارقىلى جاردەماقى تاعايىنداۋدىڭ اشىقتىعى ارتتى جانە الۋشىلار سانى شامامەن 39%-عا قىسقاردى.
كەزدەسۋ بارىسىندا مالىك وتاربايەۆ پرەزيدەنت جولداۋى جەتى باسىم باعىتتى قامتيتىنىن اتاپ ءوتتى: سيفرلاندىرۋ، ەكونوميكالىق دامۋ، يننوۆاسيالار، ءبىلىم بەرۋ، دەنساۋلىق ساقتاۋ، الەۋمەتتىك ساياسات جانە قۇقىق ءتارتىبىن نىعايتۋ. ول «زاڭ مەن ءتارتىپ» يدەولوگەماسىنىڭ، سونداي-اق «تازا قازاقستان» جانە «ادال ازامات» باعدارلامالارىنىڭ تۇراقتى جانە ادىلەتتى قوعام قالىپتاستىرۋداعى ماڭىزدى ءرولىن ەرەكشە اتاپ كورسەتتى.
پرەزيدەنت كەڭەسشىسى سيفرلىق تەحنولوگيالار مەن جاساندى ينتەللەكتتى ەنگىزۋگە ەرەكشە كوڭىل ءبولىپ، ولاردى ەلدىڭ باسەكەگە قابىلەتتىلىگىن ارتتىرۋدا، ەكونوميكالىق ءوسىمدى جەدەلدەتۋدە، مەملەكەتتىك باسقارۋدىڭ تيىمدىلىگىن كۇشەيتۋدە، قاۋىپسىزدىكتى قامتاماسىز ەتۋ مەن حالىقتىڭ ءومىر ءسۇرۋ ساپاسىن جاقسارتۋدا نەگىزگى قۇرال رەتىندە قاراستىردى. سونىمەن قاتار ول جاستاردىڭ سيفرلىق داعدىلاردى تەز مەڭگەرىپ، يننوۆاسيالىق شەشىمدەر جاساي الاتىنىن ەرەكشە اتاپ ءوتتى. جاڭا ۇرپاق قازاقستاننىڭ سيفرلىق ترانسفورماسياسىنىڭ نەگىزگى قوزعاۋشى كۇشى بولۋى ءتيىس.
كەزدەسۋ بارىسىندا ءوز ويلارىن كەربۇلاق اۋدانىنىڭ انالار كەڭەسىنىڭ ءتورايىمى عاليا اقباسوۆا، جەكە كاسىپكەر اۋلەت قايرانوۆ، سونداي-اق اۋداندىق ارداگەرلەر كەڭەسىنىڭ ءتوراعاسى بوكەن رىسبەكوۆ تە ءبىلدىردى.
