جەتىسۋ وبلىسىندا پروكۋراتۋرا ءبىلىم بەرۋ مەكەمەلەرىندە بالالاردىڭ قاۋىپسىزدىگىن قامتاماسىز ەتۋگە قاتىستى 200-دەن استام بۇزۋشىلىقتى انىقتادى، دەپ حابارلادى Dalanews.kz.

پروكۋراتۋرانىڭ مالىمەتىنشە، سارقان، قاراتال جانە پانفيلوۆ اۋداندارىنداعى 12 بالاباقشانىڭ جانىنداعى جولدا جاياۋ جۇرگىنشىلەر وتكەلدەرى مەن «بالالار» بەلگىلەرى جوق. ال سارقان جانە الاكول اۋداندارىنداعى ەكى بالاباقشانىڭ اۋماعى تولىق قورشالماعان. سالدارىنان مەكەمە اۋماعىنا بوگدە ادامداردىڭ كەدەرگىسىز كىرۋىنە مۇمكىندىك بەرىلگەن.

بۇعان قوسا پانفيلوۆ اۋدانىنىڭ 55 جەكە بالاباقشاسىندا "شاقىرۋ دابىل تۇيمەسى" جۇيەسى جوق. 40 بالاباقشادا ءورت قاۋىپسىزدىگىن حابارلاۋ جۇيەسى جۇمىس ىستەمەيدى، ال ەكى بالاباقشادا ولار مۇلدەم بولماعان. الاكول، ەسكەلدى جانە سارقان اۋداندارىنىڭ 7 بالاباقشاسىندا بەينەباقىلاۋ كامەرالارىنىڭ كوپشىلىگى جۇمىس ىستەمەيدى.

اقسۋ، سارقان اۋداندارى مەن تەكەلى قالاسىنىڭ 9 بالاباقشاسى ءوز قىزمەتىن مەرزىمى وتكەن سانيتارلىق قورىتىندىلار نەگىزىندە ىسكە اسىردى. ال كەيبىر جاعدايلاردا مەرزىمى وتكەن مەديسينالىق پرەپاراتتار ساقتالعان. اقسۋ اۋدانىنىڭ 8 بالاباقشاسىندا ىشەك تاياقشالارى تابىلدى. سونداي-اق ەڭبەك زاڭناماسىنىڭ تالاپتارىنا قايشى، وبلىستىڭ بالاباقشالارىندا بۇرىن قىلمىس جاساعانى جاۋاپكەرشىلىككە تارتىلعان 11 ادام جۇمىس ىستەگەن، – دەلىنگەن پروكۋراتۋرا حابارلاماسىندا.

سونىمەن قاتار، پروكۋرورلار كەربۇلاق اۋدانىنىڭ بالاباقشالارىندا جالپى سوماسى 25 ملن تەڭگەدەن استام بيۋدجەت قاراجاتىن جىمقىرۋ فاكتىلەرىن انىقتادى. ولار بويىنشا سوتقا دەيىنگى تەرگەۋ باستالدى.

بارلىق انىقتالعان بۇزۋشىلىقتار بويىنشا 22 قاداعالاۋ اكتىسى ەنگىزىلدى. 40 ادام اكىمشىلىك جاۋاپكەرشىلىككە، 7 ادام تارتىپتىك جاۋاپكەرشىلىككە تارتىلدى، – دەلىنگەن حابارلامادا.