وبلىس اكىمىنىڭ ورىنباسارى نۇربول تۇراشبەكوۆ جەتىساي اۋدانىنا جاساعان ءىسساپارى بارىسىندا «كيىكباي ستروي سەرۆيس» ج ش س تاراپىنان جۇرگىزىلىپ جاتقان تىك درەناجدى ۇڭعىمالاردىڭ قۇرىلىسىمەن تانىستى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
نەگىزگى تابىسى مەن كۇن كورىس كوزى اگروسەكتورمەن تىكەلەي بايلانىستى اۋداندا سوڭعى 10 جىلدا اۋىل شارۋاشىلىعى داقىلدارىنىڭ ءونىمى مەن ساپاسى تومەندەگەن. بۇل اۋدان اۋماعىندا ورنالاسقان 380 دانا تىك درەناجدى ۇڭعىمالارىنىڭ 210 داناسىنىڭ ىستەن شىعىپ، جەراستى سۋى دەڭگەيىنىڭ كوتەرىلۋىمەن تىكەلەي بايلانىستى.
اۋدانداعى جالپى اۋماعى 16 010 گەكتار اۋماقتا ورنالاسقان 97 دانا درەناجدى، ناقتىراعى، ماقتالى اۋىلدىق وكرۋگىندەگى 7932 گەكتار القاپتى قامتيتىن 47 دانا، قىزىلقۇم اۋىلدىق وكرۋگىندەگى 5766 گەكتار القاپتى قامتيتىن 41 دانا جانە اباي اۋىلدىق وكرۋگىنىڭ 2312 گەكتار القابىن قامتيتىن 9 دانا درەناجدىڭ قۇرىلىسىن جۇرگىزۋى ءتيىس «كيىكباي ستروي سەرۆيس» ج ش س مەكەمەسى بۇگىندە 46 دانا جاڭا تىك درەناجدى ۇڭعىمالاردى بۇرعىلاعان.
ال سۋارمالى جەردىڭ 35 921 گەكتارىنىڭ 19 911 گەكتارىنا 113 دانا درەناج ورناتۋدى جوسپارلاپ وتىرعان «ارت-قۇرىلىس» ج ش س مەكەمەسى ىنتىماق، ش.دىلدابەكوۆ جانە ج.ەرالييەۆ اۋىلدىق وكرۋگتەرىنەن 95 دانا ۇڭعىمانى بۇرعىلاعان.
نۇربول ءابدىساتتار ۇلى سالا ماماندارىمەن جۇزدەسۋ بارىسىندا مەملەكەتتىك قارجى ەسەبىنەن جۇزەگە اسىپ جاتقان جوبالاردىڭ ساپاسى مەن وندىرىستىك كەستەگە ساي جۇرگىزىلۋىن تاپسىردى.
وتكەن جىلدىڭ قازان ايىندا ق ر سۋ رەسۋرستارى جانە يرريگاسيا مينيسترلىگى «قازسۋشار» رمك تاپسىرىسىمەن «يسلام دامۋ بانكى» قارجىسى ەسەبىنەن باستالعان 210 تىك درەناجدى ۇڭعىمالاردى قايتا قالپىنا كەلتىرۋ جۇمىستارى 2026 جىلى تولىعىمەن اياقتالىپ، ەل يگىلىگىنە تاپسىرىلادى دەپ كۇتىلۋدە. بۇگىندە 210 تىك درەناجدى ۇڭعىمانىڭ 141ء-ى قالپىنا كەلتىرىلگەن.
