بۇرىن ۇلتتىق ەكونوميكا مينيسترلىگىنە قاراعان جەر ماسەلەسىمەن ەندى اۋىل شارۋاشىلىعى مينيسترلىگى اينالىساتىن بولدى. اۋىل شارۋاشىلىعى مينيسترلىگىنىڭ ىشىنەن جاڭادان جەر رەسۋرستارىن باسقارۋ كوميتەتى قۇرىلدى.

بۇل تۋرالى بۇگىن ورتالىق كوممۋنيكاسيالار قىزمەتىندەگى بريفينگكە قاتىسقان اۋىل شارۋاشىلىعى ءمينيسترى اسقار مىرزاحمەتوۆ ءمالىم ەتتى.

«ەلباسىنىڭ جارلىعىنا سايكەس، ۇلتتىق ەكونوميكا مينيسترلىگىنە قاراعان جەر ماسەلەسىن اۋىل شارۋاشىلىعى مينيسترلىگىنە بەرۋ تۋرالى شەشىم قابىلداندى. وسىعان وراي، سەيسەنبى كۇنى ۇكىمەت وتىرىسىندا اۋىل شارۋاشىلىعى مينيسترلىگىنەن ارنايى كوميتەت، ياعني، جەر رەسۋرستارىن باسقارۋ كوميتەتىن قۇرۋ تۋرالى شەشىم قابىلداندى. ۇلتتىق ەكونوميكا مينيسترلىگىندە ىستەگەن قىرىق جەتى قىزمەتكەر اشم ىشىنەن قۇرىلعان وسى كوميتەتكە اۋىسىپ جاتىر»،-دەپ حابارلادى ا.مىرزاحمەتوۆ.

ق ر پرەمەر-مينيسترىنىڭ ءبىرىنشى ورىنباسارى، جەر رەفورماسى جونىندەگى كوميسسيا ءتوراعاسى باقىتجان ساعىنتايەۆ حابارلاعانداي، كوميسسيا جانىنان 1434 ءنومىرلى Call-ورتالىق اشىلىپ، ءبىر اپتا ىشىندە 700-دەن استام ۇسىنىس-پىكىر تۇسكەن. ال، اۋىل شارۋاشىلىعى ءمينيسترى ا.مىرزاحمەتوۆتىڭ مالىمەتىنە سۇيەنسەك، وسى 700 سۇراقتىڭ 90 پايىزى جەردى جەكەمەنشىكتە پايدالانۋ توڭىرەگىندە بولىپ وتىر ەكەن

كەنجەكەي توقتامۇرات قىزى

 

قازاقپارات