“قاسيەتتىم – جەلتوقسان!” پۋبليسيستيكالىق كىتابىندا اۆتور 1986 جىلعى الماتى قالاسىنداعى جەلتوقسان كوتەرىلىسىنىڭ شىعۋ سەبەپ-سالدارى مەن وقيعانىڭ ءوربۋ بارىسىن قامتۋدى كوزدەگەن. سونىمەن قاتار، وقيعاعا قاتىسقان جانە ودان كەيىنگى كەزدە ازاماتتىق ۇستانىمىن كورسەتكەن زيالىلارىمىزدىڭ، جاستارىمىزدىڭ قايسارلىعى تۋرالى سىر شەرتىلەدى. جەلتوقسان كوتەرىلىسىنىڭ تۇتانۋىنا تۇرتكى بولعان جايتتاردان باستاپ، جەلتوقساندىق قاћارمانداردىڭ ىس-ارەكەتتەرى اشىپ كورسەتىلىپ، جەلتوقساندىقتاردىڭ ءبىرازىنىڭ تىزىمدەرى مەن سول 1986 جىلعى وقيعاعا قاتىسقان جاستاردىڭ دەرەكتەرى بەرىلگەن. اۆتور جەلتوقسان كوتەرىلىسىنە قاتىستى تولىققاندى ماعلۇماتتى ناقتى دەرەكتەرمەن دايەكتەيدى، جەلتوقساندىق زيالى قاۋىم بولمىسىن اشۋعا ۇمتىلا وتىرىپ، جەلتوقسان كوتەرىلىسىنىڭ بىزگە بەيمالىم قىرلارىن بايانداۋدى ماقسات تۇتقان.
جەلتوقسان كوتەرىلىسى قازاق تاريحىنىڭ اسقاق كەزەڭى ەكەنىنە ونى مۇقيات زەردەلەگەن وقىرماننىڭ كوزى جەتە تۇسەرى انىق. اۆتوردىڭ بۇل تياناقتى ەڭبەگى – قاhارماندىق كۇرەستىڭ شىنايى بەينەسى مەن تولىق اقيقاتىن اشۋداعى ساۋاپتى دا قاجىرلى تالپىنىسى، يگىلىكتى ءىستىڭ ماۋەلى جەمىسى.
بولاتبەك تولەپبەرگەن ءار جىلداردا جارىق كورگەن تاريحي اعارتۋشىلىق باعىتتاعى ونشاقتى كىتاپ پەن «سۇيىكتى مەنىڭ وتانىم» جانە «تاۋەلسىزدىك بەسىگىن تەربەتكەن» اتتى دەرەكتى فيلمدەردىڭ اۆتورى.
اتالعان كىتاپ مادەنيەت جانە سپورت مينيسترلىگىنىڭ «ادەبيەتتىڭ الەۋمەتتىك ماڭىزدى تۇرلەرىن باسىپ شىعارۋ» باعدارلاماسى بويىنشا 2000 دانامەن «كەرەمەت مەديا» باسپاسىنان جارىق كوردى.
"قمد" اقپارات
