مارات جىلانبايەۆتىڭ ادۆوكاتى مەيىرجان دوسقارايەۆتىڭ ۇستىنەن ءىس قوزعالعان. بۇل تۋرالى ادۆوكات الەۋمەتتىك جەلىدە مالىمدەدى، دەپ حابارلايدى Dalanews.kz.
"ماعان قاتىستى "جالعان اقپارات تاراتۋ" بويىنشا اكىمشىلىك قۇقىقبۇزۋشىلىق تۋرالى كودەكستىڭ 456-2-بابى 3-بولىگى بويىنشا اكىمشىلىك قۇقىقبۇزۋشىلىق تۋرالى حاتتاما تولتىرىلدى"، – دەدى ادۆوكات TikTok جەلىسىندە.
مەيىرجان دوسقارايەۆتىڭ پىكىرىنشە، بۇل - ادۆوكاتتىق قىزمەتىنە جاسالىپ جاتقان ساياسي قىسىم. ونىڭ ايتۋىنشا، مارات جىلانبايەۆقا بارعان سايىن ول بەرگەن حات، شاعىم مەن وتىنىشتەردى سىرتقا شىعارماي الىپ قالاتىن كورىنەدى.
"ادۆوكات رەتىندەگى قۇقىعىم شەكتەۋلى. بيلىك ادام قۇقىقتارىنىڭ بۇزىلۋىنا جاۋاپ بەرۋدىڭ ورنىنا، ادۆوكاتتى قۋدالاپ، اۋىزىمدى جاپقىسى كەلەدى. بۇل مارات جىلانبايەۆتى قورعاۋ قۇقىعىنان، ال حالىقتى شىندىقتى ءبىلۋ قۇقىعىنان ايىرۋعا باعىتتالعان. مەن ءوز جۇمىسىمدى جالعاستىرامىن. مەن ماراتتى قورعايمىن جانە ونىڭ جاعدايى تۋرالى جۇرتشىلىقتى ودان ءارى حاباردار ەتەمىن. كۇرەس اياقتالعان جوق"، – دەدى ول.
ايتا كەتەيىك، بۇعان دەيىن مارافونشى، ءقازىر تۇرمەدە وتىرعان مارات جىلانبايەۆقا ستەپنوگورسكىدەگى تۇزەتۋ مەكەمەسىندە قىسىم كورسەتىلىپ جاتقانى تۋرالى اقپارات تارادى. بۇل تۋرالى ونىڭ ادۆوكاتى مەيىرجان دوسقارايەۆ مالىمدەدى.
